[有沙入眼]是咁的，我覺得我住嗰度有啲唔妥: 124已經唔喺度

「我唔摸！係佢殺咗媽咪！」我記得自己塊面濕哂，眼淚口水鼻涕都流哂出嚟。妹妹嘅存在就係再三提醒我已經無咗媽咪嘅證據。

妹妹出世嘅時候，我已經三歲，但仍然理解唔到咩叫「大嘅救唔翻」。我只能夠認知到媽咪被推入手術室之後就再無出過嚟。

「點解咁耐嘅？」我拉一拉阿婆嘅衣襬，但係佢無答我。

爸爸同阿公坐喺醫院嘅凳度，十指交握，垂低頭，罕見嘅淚水喺鼻尖聚集，墮落。

媽咪肚仔痛要入醫院，係咪好唔舒服呀？



屙完臭臭未呢？

懷抱期望，只會令自己喺等待真相嘅日子之中倍受煎熬。就好似一直等前度再次搵自己，等吓等吓，期望會轉化為焦慮，再淡化成絕望，到最後變成就算發生咩事都已經無所謂。

但三歲嘅我，對死亡毫無概念，一直抱持希望等媽咪星期六日再嚟探我。然後被告知，媽咪唔會再翻嚟喇，期望直接扭曲為絕望。而我知道，絕望永遠唔會步入下一個階段，無可能會變得無所謂。

已經唔喺度，唔會翻嚟喇。

無特別覺得悲傷，因為本來就無同媽咪渡過太多時間。純粹係，每到星期六日，一到媽咪應該㩒鐘嘅時間，望住唔會再「咔嚓」咁打開嘅門，不知不覺就會喊。