[有沙入眼]是咁的，我覺得我住嗰度有啲唔妥: 117另一段記憶

眼前嘅映象好似投影喺畀風吹動嘅白布之上咁搖曳不停，回憶變成漣漪盪漾嘅水池，到水面回復平靜之後，展示出池中另一段記憶。

至今已經無可能再記起嘅回憶，作為人類最無憂無慮嘅一段日子，我仲係BB時期嘅記憶。

口中係未生牙嘅牙肉咬住奶嘴嘅觸感，妹吓妹吓，好有安全感。

爽身粉嘅芳香，仲有沖完涼之後微濕嘅稀薄髮絲散發嘅甜味，隨露台嘅風播放種子，滲入我同阿婆鼻中嘅泥土，滋潤靈魂。

阿婆抱住我，坐喺露台嘅摺凳。佢俟住運轉中嘅開蓋式洗衣機，我俟住佢。



露台外面一片翠綠，樹葉好似有生命咁擺動，發出沙沙沙嘅聲音。

精靈嘅眼仔好奇咁望住外面嘅世界。

純淨無垢嘅眼神之中，仲未有經歷，仲未有後悔，仲未有遺憾。