[有沙入眼]是咁的，我覺得我住嗰度有啲唔妥: 112未搞清楚

當然，嗰陣我仲未搞清楚，其實淨化嘅過程係以某個舉動為契機，回收記憶，最後先以一句說話完成淨化。

對吳非凡係問佢個名，拉佢離開透明牆，然後電視播放回憶，最後講出佢嘅願望，完成淨化。

對Lucy係接觸衣櫃嘅核心，衣櫃投射出過去嘅回憶，最後講出「我搵到你」完成淨化。

對阿公係抆走佢嘅豬頭面具，我體驗翻細個嘅記憶，最後同佢永別，完成淨化。

我行到阿婆面前。



未有舉動，未有回憶，但率先講出我認為可以淨化阿婆嘅話語。

我一直等你，點解你唔翻嚟？

「阿婆，我翻嚟喇。」

阿婆木無表情嘅樣扭向我，放低敲打水錶嘅手。

伸向背後。



「阿金！！！！！！」

一碌麵粉棍閃現喺眼前，毫不猶豫向我額頭扑落嚟。重擊令我嘅視線三百六十度旋轉，意識畀黑暗迅速呑食。

阿婆隻手仲好好力水。

我最後聽到嘅說話。