[有沙入眼]是咁的，我覺得我住嗰度有啲唔妥: 111關鍵字

「咁我明喇。唔駛驚，恐怖體驗係源自我地好重要嘅記憶，我而家就淨化佢。你好好睇住，今次要保持清醒，拎翻啲記憶。」同阿婆仲有兩個單位嘅距離，我再次起步，但係畀Lucy拉住咗衣角。

「唔好過去呀！一陣佢又變曱甴點呀？你死梗架！」

我向Lucy微笑，擰擰頭：「佢只會喺你嘅體驗之中變曱甴。會變成曱甴，都係一種線索。如果我有咩事的話，你要喺蛛絲馬跡之中推敲翻自己以前嘅記憶。有翻回憶，就可以淨化。」

「過嚟吖。」無高低起伏嘅呼喚。

我放開Lucy隻手：「你驚就留喺度，交畀我。」



其實阿婆係邊個，已經呼之欲出。

我腦中對一句說話好有信心，相信就係淨化嘅關鍵字。