[有沙入眼]是咁的，我覺得我住嗰度有啲唔妥: 95差一句說話

後來，阿公就將肉檔把刀拎翻屋企，帶刻咗字嘅豬肉刀翻去街巿。

「經過豬肉檔，佢總會畀把刀人睇，笑住話：『我兩個孫刻畀我架。』佢個樣，唔知仲以為中咗六合彩。」

至於阿公有幾重視我地刻字嗰把刀，我要到葬禮嗰日，先由佢嘅熟客口中知道。

阿公係街巿收檔嗰陣，因為洗地跣親，頭落地，失救而死。

聽講，意外發生嗰日，阿公無論生客定熟客，都特登再叫佢地睇吓，兩個乖孫幫佢刻上「民族英雄」四個字嘅豬肉刀。



就好似一早知道，自己得翻最後一次炫耀嘅機會咁樣。

之前有人問佢，你知依四隻字咩意思嗎？

阿公話，唔知，佢唔識字。

唔知咩意思，點解仲可以笑得咁幸福？

佢話，唔知點解，見住依四隻字，就可以笑得好幸福。



可能因為係兩隻豬刻畀我嘅關係啦。

我手執豬頭面具，望住安祥同我對望嘅豬肉佬。

「阿公⋯⋯」

佢微微點頭。

我仲差一句說話，無同你講。因為我任性，因為我鬧脾氣，因為我幼稚。