[有沙入眼]是咁的，我覺得我住嗰度有啲唔妥: 93豬面具

溫柔嘅聲音驚醒發呆嘅我，此時此刻我同一個細路女喺屋企，小心翼翼咁合力抽出放喺廚房嘅豬肉刀。

「哥哥唔好發呆啦，好重呀！」

我對手揸刀柄，阿妹對手揸刀背，一齊將把刀拎出客廳，橫放喺地吓。

兩把𠝹刀「咔咔咔」咁，係推出刀片嘅聲音。

「我𠝹兩個你𠝹兩個。」



由幾時開始，依段回憶完完全全被我淡忘到好似無發生過咁？

童年嘅心意，總有一日，連再次記起都無辦法做得到。

幼稚園第一次寫心意卡畀爸爸嗰陣，我寫咗啲咩呢？我嗰陣所懷抱嘅情感，一早已經畀時間嘅沙粒埋葬咗喺無法抵達嘅地底。

「阿公，生日快樂呀。」我同阿妹買咗個豬仔面具，喺阿公翻屋企嘅時候向佢抛廁紙碎。

「多謝你肯帶無人買嘅我啲肉翻屋企呀。噗噗。」我扮豬叫。



「仲有等到我啲肉壞先丟呀。噗噗。」阿妹學我扮豬叫。

「我地係豬仔界嘅代表，特登嚟多謝阿公。噗噗 。」兩隻豬一齊講。

好似嚇呆咗嘅阿公，笑一笑，搖搖頭：「你兩個⋯⋯哎呀，我係人，聽唔明豬講野喎。」

阿妹望一望我，然後跑去佢身邊，除咗自己個面具。阿公踎低，等阿妹可以將個面具戴喺佢面上。

「變身！」



「我變咗豬喇，你地講咩話？⋯⋯噗？」突登喺最後扮豬叫。