[有沙入眼]是咁的，我覺得我住嗰度有啲唔妥: 92翻屋企

我笑住行翻上去，垂低雙手扮喪屍：「哎呀，好攰呀，我行唔到翻屋企喇。」

阿公露出一個睇穿小朋友心意嘅微笑，面容猶如聖誕老人。

「咁你想點呀？」

「孭我丫。」

「好好好，上嚟。」佢半彎腰，我就好似隻青蛙咁跳上去。阿公失一失平衡，我差啲喺佢背脊跌翻落嚟：「跌喇！」



阿公一個馬步紮穩，兩手兜住我個八月十五向上推一推。我當自己係隻樹熊，攬住佢條頸。

「你唔舒服呀？」

「無呀，阿公平日抬豬都係咁抬啦。」

「噢，好啦，翻屋企翻屋企！」

「嗯，翻屋企喇。」