[有沙入眼]是咁的，我覺得我住嗰度有啲唔妥: 88微笑

豬肉佬一面安祥嘅微笑，溫柔得令人心痛。

我記得依個微笑。

眼前嘅光景扭曲，好似將兩種水彩溝成嘅旋渦。

旋渦之間猶如颱風眼嘅空洞將豬肉佬、後樓梯嘅空間同Lucy捲入其中。

熟悉嘅臭味。



「你大個仔喇，以後要幫手丟垃圾喇知無？」

我點點頭：「阿公，點解要丟去後樓梯？」

我拖住一隻大人粗糙嘅手掌。

「因為壞啦嘛，放喺走廊驚臭親鄰居。」

「咁阿公唔好再帶啲賣唔出嘅豬肉翻嚟咪得囉。」



「咁你無肉食架喇喎。」

「呀！咁唔好，都係照拎啦。」

佢話，想將收檔後嘅豬肉帶翻屋企，食得幾多得幾多，到真係壞先再丟。

雖然係一個屠夫，但係會可憐啲豬。