[有沙入眼]是咁的，我覺得我住嗰度有啲唔妥: 76曱甴

阿婆擘大口，眼白染成黑色，一堆墨黑異物由佢口腔入面湧出嚟，轉瞬間就爬滿阿婆個身。

嗰啲表面油亮有光澤，移動力極高嘅異物其實平時隨處可見，只係普通曱甴。但我從來無見過數量多到可以淹沒一個人嘅曱甴群。

Lucy好似用盡咗成世人嘅氣力尖叫一聲，趁曱甴阿婆向佢伸出手之前掉頭走。

我同Lucy之間相隔三個單位嘅距離，我察覺到旁邊嘅鐵閘同門毫無先兆咁打開咗。情況簡直好似啱啱睇到一張所有單位都閂埋門嘅相，下一瞬間張相入面就有一間屋開咗門。

無人開門，無人開閘，無聲音，但係門開咗。



雖然個單位開咗門擺到明係陷阱，但情急之下我唔理得咁多，即刻跑咗入去。

「過嚟！」

我將手伸向Lucy，阿婆亦一拐一拐咁向Lucy接近，向佢毫無防備嘅背脊伸出畀曱甴亂爬嚼食嘅黑手。

「伸隻手嚟！」

Lucy接收到我嘅指令之後一路跑一路向我伸手，差半隻手掌位。



遠方嘅曱甴阿婆背脊噴出兩塊帶黏液嘅昆蟲翼，佢手前亂爬嘅曱甴同時一齊展翅起飛，成千上萬嘅昆蟲拍翼聲「啪啪啪噠噠噠噠噠」咁席捲昏暗嘅走廊。