[有沙入眼]是咁的，我覺得我住嗰度有啲唔妥: 75求救

Lucy拉開鐵閘，跨步踏入走廊，嗰一刻，我知道下一個恐怕體驗要正式開始。

唔怕神一樣嘅對手，亦唔怕豬一樣嘅朋友，最怕係蠢過隻豬嘅隊友。

不過Lucy行出走廊之後，我嘅痛楚就開始減弱，可能係因為佢進入另一個空間而激活咗另一個體驗嘅關係，我四肢嘅劇痛漸漸消失。

「等陣！」當手腳無再出現畀刀斬斷嘅感覺後，我立即起身追出去。身後嘅大門同時「砰」一聲自動閂埋。

當我出到外面，就見到Lucy已經跑遠咗，同我大約有四個單位嘅距離。



就喺佢前面幾個身位嘅地方，有個阿婆目不轉睛咁望住屋企門前嘅水錶。

「嗰度有人！婆婆！婆婆！救命呀！」

Lucy上氣唔接下氣咁跑向阿婆，我亦起步跑過去，雖然唔知個阿婆係咩來頭，但既然未經過共鳴就見得到，咁好明顯唔係其他人類意識。

個阿婆係恐怖體驗。

「唔好過去呀！」



阿婆個頭呈九十度扭向Lucy，佢無視Lucy嘅求救，右手手指一吓一吓篤落個水錶度。

頭部發痛，一堆「血」字突然佔據我嘅視線。我更加肯定自己以前見過依個阿婆，仲畀佢用好變態嘅方式虐待過。

問題係Lucy就好似不怕虎嘅初生之犢，佢嚟到依個世界之後淨係得模糊嘅記憶，未試過喺清醒狀態遇到恐怖經歷，令佢以為個阿婆係可以求救嘅普通居民。