[有沙入眼]是咁的，我覺得我住嗰度有啲唔妥: 71懷疑

「嗯。見你之前，我好似發緊惡夢咁。大致上係⋯⋯我匿喺衣櫃入面避緊一隻怪物，然後因為外面好耐無動靜，我就開小小門望出面⋯⋯之後⋯⋯之後隻怪物就喺我眼球前面閃出嚟。」

Lucy講到後面，用手環抱自己雙臂，睇得出佢真係好驚。

我嘅恐怖體驗係衣櫃入面嘅怪手，佢嘅恐怖體驗就係衣櫃外面嘅怪物，其實已經驗證咗啱啱段回憶嘅關係。但就算我地兩個唔係兄妹，都肯定係有某種聯係。

如果Lucy真係我個妹，咁只要將焦點放喺幫佢回復記憶之上就得。但若然佢唔係，問題就會複雜咗⋯⋯Lucy同我喺現實會有咩關係呢？

「其實你自己都知，依度有啲唔妥啦下話？」



Lucy移開視線唔望我，諗咗一諗，無正面回應我，反而問：「好啦假設你講嘅野都係真嘅，我地離開嘅方法就係淨化。但具體嚟講，要點做？」

不過依個問題，已經代表佢間接承認咗依度係遊戲世界嘅事實。

「唔知。」

「吓？」我感覺到，懷疑嘅氣息又開始瀰漫喺我地之間，盤旋而上。