[有沙入眼]是咁的，我覺得我住嗰度有啲唔妥: 67無

「好喇，我當你講真，我地存在喺遊戲世界入面，咁係咩人將我地嘅意識植入過嚟呢？」

「雖然我唔可以百分百肯定，但依個遊戲係畀人睇我地點死嘅，所以可能係好憎我地嘅人將我地放入嚟。又或者我地參加咗電視真人show，又可能係畀有錢人當玩具玩，大概係依幾種可能性。」

至於吳非凡嗰種自己放自己入嚟嘅情況，可能性就無咁大，起碼我覺得自己唔會重口味到想睇自己慘死，所以就無同佢講。

「聽起上嚟都幾合理。好啦，我大致上整理好一啲問題，關於你之前講過嘅共鳴。」阿妹停一停，身體前靠：「你同我可以見面係靠共鳴，而共鳴嘅前提係我地現實中有關聯，但係我記唔起我同你有咩關係喎。」

「唔出奇，我同吳非凡共鳴之後，都係得佢攞翻記憶，我咩都記唔起。」



即使睇翻淨化之後嘅回憶片段，都無嗰種「呀！我記翻哂喇！」嘅感覺。

阿妹露出懷疑嘅表情望住我。

好明顯，佢記唔起自己經歷過嘅恐怖體驗，亦無淨化之後嘅記憶。諗翻起嚟，啱啱佢仲喺衣櫃入面，根本無睇到播放嘅片段，唔知都好正常。

咁嘅情況下我決定試吓用之前嘅方法，自報姓名，睇吓佢記唔記得翻啲野。

「你可以唔信我住，但好快又會有新嘅恐怖體驗出現，到時唔到你唔信。係喇，都未自我介紹，我叫曲金鉉。」



我望住阿妹三秒，佢又望住我，唔似記得翻以前嘅過去。

「然後呢？」

「呃⋯⋯你無記翻啲咩？」

「無。」