[有沙入眼]是咁的，我覺得我住嗰度有啲唔妥: 60搵到你喇

男仔扑一扑女仔個天靈蓋。

「好痛呀，又哼我個頭殻頂。」

「到時我會嚟救你架啦。」

細路女嘟一嘟嘴，好似有啲唔情願，但又忍唔住甜笑嘅表情，然後攬實男仔隻手：「你話架，哥哥大過我，唔可以講大話。嘻嘻。」

兩個小朋友，就咁喺無大人嘅公屋單位入面，望住部舊式厚身電視，靜靜咁睇完鋼之鍊金術師。佢地嘅父母呢？監護人呢？



「哥哥，我地玩丫。」

「你想玩乜呀？」

「捉依因囉！嚟搵我丫！」

男仔反一反白眼，但仍然點頭答應陪女仔玩。

佢合埋眼，女仔就即刻跑去衣櫃匿埋。



當男仔數完十聲，就喺屋企環視，但其實咁細嘅公屋，又有邊度可以匿埋呢？男仔諗都無諗就去打開衣櫃，依個時候女仔張開雙手好似青蛙咁跳出嚟：「嘩！我係真理之門！」

哥哥抱住跳過嚟嘅妹妹，差啲失平衡，但係佢地兩個都好開心咁笑到哈哈聲。

一種來自昔日回憶深處，最純粹、最快樂嘅笑聲。

由幾時開始，依種笑聲、依個笑容，寂寂無聞咁遺落於記憶中嘅一角呢？

曾經嘅快樂，猶如陽光永遠照唔到埋去嘅牆邊同地面嘅交界，隨年月流逝鋪滿慶埃，再引唔起我嘅注意。



「我⋯⋯」失血令聲線無力，但仍然用最後嘅力氣講出我記得嘅細語。

每一次同佢玩捉依因，都係我做鬼。每一次，佢都匿喺衣櫃。

每一次，當我打開衣櫃，都會微笑住講嘅一句細語。

「搵到你喇。」