[有沙入眼]是咁的，我覺得我住嗰度有啲唔妥: 59捉依因

係小學嘅童年回憶，第一次睇午夜播嘅青少年向動畫時候嘅震撼。

人體煉成後嘅媽媽以純白扭曲嘅肢體向愛德華招手，猙獰瘋狂嘅面目深深烙印喺腦海入面。仲有之後嘅真理之門同帶走代價嘅黑手，起碼全部都係睇多啦A夢同爆旋陀螺依啲兒童向卡通片嘅時候無見過嘅視覺震撼。

煉成失敗嘅媽媽擁有嘅慘白，結合真理之門嘅黑手，經過系統再現變成衣櫃之中嘅白手。

渡過咗十幾年歲月，就算舊版鋼鍊嘅劇情早已喺腦中被磨滅到無咩印象，但我仍然記得睇頭幾集嘅衝擊。

更加重要嘅係我仍然記得，身邊有個人陪我一齊睇鋼鍊。



就算我已經連佢個名都唔記得，但只要留低到當日撼動心靈嘅時候，佢喺我身邊嘅片段就足夠。

「哥哥呀，我有時會諗呢，會唔會有一日突然嚟隻狼人或者吸血鬼嗰啲怪物，殺哂全個屋邨嘅人丫嗱？」

「狼人就無喇，變態殺人狂易搵啲。」

「咁就殺人狂啦，然後死淨我一個，我就匿埋喺衣櫃入面睇住佢入嚟搵我。」細路女倒抽一口涼氣：「喺個衣櫃入面望出去，希望佢搵我唔到啦。」

有時會諗，如果有人追殺自己，自己可以匿喺屋企邊一個地方。



尤其係玩捉依因，匿埋等人捉嘅時候，唔多唔少會自己嚇自己：「如果捉我嗰隻真係鬼⋯⋯」將要捉人嗰個幻想成真係攞人命嘅怪物，總覺得咁樣幻想之後，普通嘅捉依因都會變得無比刺激。

「咁我喺邊呀？」男仔問。

「你？哎呀，梗係咁啱唔喺屋企啦！衣櫃淨係裝得落我一個架炸！」