[有沙入眼]是咁的，我覺得我住嗰度有啲唔妥: 55搵我吖

「你想玩乜呀？」

係咪有人？

突然，我間房好似裝咗環迴立體聲喇叭咁，有把熟悉嘅女聲清晰咁響起。之前嘅吳非凡都有講過同一句說話，即係我啱啱講嘅野同依度某個人產生共鳴？

「嚟搵我丫⋯⋯」

頭微微一痛，我以前⋯⋯已經聽過依句說話，然後畀白手撕成碎肉。而且唔止一次，感覺好似無限重複畀衣櫃怪物殺死過成千上萬次。



「嚟搵我丫。」

重複嘅耳語猶如午夜半醒之間聽到嘅夢囈。

點解當依句說話同腦入面嘅印象重疊嗰陣，我竟然有種無辦法再翻轉頭嘅哀傷呢？

正當我仲喺混沌嘅大腦中摸黑前進，企圖搵翻昔日嘅悲傷源頭到底喺邊嘅時候，衣櫃入面隻野已經喪失耐性：「我叫你搵我呀呀呀呀呀呀呀⋯⋯」

「呀」字嘅尾音扭曲成詭異笑聲，我知道佢已經準備好向我攻擊。



我留意到，依啲體驗雖然喺細節上會有分別，但大致上會發生嘅事件同會聽到嘅對白都係大同小異，無限重複。

叮叮。