[有沙入眼]是咁的，我覺得我住嗰度有啲唔妥: 47那面牆，是鑿不穿的

直到佢十八歲嗰年，劃時代嘅VR「意識植入」技術推出巿場。「無論你平時幾忙，只要將意識植入VR裝置，就唔駛再怕時間唔夠用喇！譬如植入意識睇書、溫習、煲劇、冥想、上堂、打機，甚至係記低一段回憶、一張相、一段短片等等，然後只要回收意識，書嘅內容、套劇講乜、打機嘅開心感覺、當日回憶嘅感覺，都會知道、記得、感受到！」電視上，介紹節目宣傳緊最新嘅VR技術。

然後香港一個本土遊戲團體推出咗一隻叫「恐怖體驗」嘅植入意識遊戲，一炮而紅，勇闖國際，創造全球單日五百萬下載嘅奇蹟。

吳非凡喺某個商場嘅試玩活動玩完之後，就決定要入去嗰間公司做野。鏡頭一轉，佢已經喺一間辦公室入面對住電腦「噠噠噠」咁打鍵盤。辦公室入面少計都有百幾人，個個都嘆吓咖啡、吹吓水、打吓機、傾吓八卦趣聞咁。個環境同google嘅辦公室理念好似。

咁多個員工入面，得吳非凡一個無任何社交活動，埋頭苦幹。佢唔係天才，本身亦對電腦唔算熟悉，所以佢用哂所有時間去學電腦程式編寫，好難得先勉強入到嗰間公司。入咗去之後，佢都仍然繼續用好多時間練習、工作同學野。

至於難得嘅空閒時間，佢就會喺公司嘅匿名討論區睇吓心得，有時都會留吓言。佢好早就知道電子留言唔會被存在感影響，人人都見到，但係而家嘅佢已經唔再在乎其他人嘅注意，所以亦無特別喺網上刷存在感。



反正，就算網上嘅存在感幾強都好，翻翻現實的話，仍然唔會有人留意到自己。

直到有一日，討論區上面有一則點擊率好高，好多人留言嘅文，內容係有關改良VR嘅意識植入技術。

「痴線香港地鬼做到咩。」

「無可能架。」

「資金從哪裡來？」



「欣賞樓主不切實際嘅創意。」

「有意思咩？」

「問過老細未？」

吳非凡睇哂每一個留言，全部都話無可能。而佢，反而覺得樓主幾有諗頭，雖然個諗法其實無咩實際意義同商業價值，但佢都留咗句：「我覺得是可行的，樓主加油。」

然後佢就收到樓主嘅短訊，開始咗對話。



「你真係覺得可行？」

「應該可行。」

「真心？」

「真的啊。」

「不如我地約出嚟一齊研究吓？」

「哈哈，你不會見到我的。」

「點解咁講？」

「因為我不存在。」



「我撞鬼？」

「不是啦，怎麼說呢？我的存在感是幾乎沒有的地步，所以就算我在你面前，你也注意不到我，好像有透明的牆那樣。」

「咁我鑿穿幅牆救你。」

「哈哈，謝謝你。但那面牆，是鑿不穿的。」

我嘅眼眶不自覺咁濕咗。