[有沙入眼]是咁的，我覺得我住嗰度有啲唔妥: 46根本唔同

媽媽係喺佢升中一前因為心臟病而死。以前從來無在意過其他人嘅視線，因為只要媽媽肯注視佢就足夠嘅吳非凡，亦係由中一開始成為班上譁眾取寵嘅小丑。

其實，只係想獲得注意。

我地又有邊個，想喺無任何人注意嘅角落，默默無聞咁化成灰燼呢？同我懷抱之中無聲落淚嘅吳非凡唔同，電視中少年嘅佢，大步大步咁行路、大大聲講野、得閒就拍吓同學左邊搏頭然後閃去右邊、抆吓女同學條馬尾⋯⋯睇到我嘅眉頭忍唔住一皺，並唔係對佢浮誇嘅動作同惡作劇覺得反感，而係為佢所做嘅徒勞無功感到不忍。

「你都察覺到喇？」吳非凡問。

「係。」



眼前嘅肥佬無力咁笑一笑，搏頭震咗吓：「佢地嘅視線同媽媽嘅視線，根本就唔同。我唔係要依種視線⋯⋯喺佢地眼中，由始至終都無我。如果可以早啲發現自己係白廢心機，咁我就可以早啲得到解脫，因為要引人注意，其實真係好辛苦。」

依一刻，我終於明白點解吳非凡會對牆上嘅眼珠發狂大叫：「你地根本就唔一樣！」

對吳非凡嚟講，曾經只要靜靜存在，就足以填滿唯一嘅視線，只要媽媽眼中有佢，就係幸福。但依種視線，已經永遠失去，往後嘅注視，都唔再係佢真正想要嘅視線。

即使電視上嘅佢嘈冤巴閉，都只可以換嚟一瞬間好奇嘅注意。就喺察覺到視線嘅分別之後，吳非凡就下定決心做翻自己。電視上嘅佢，長大成中四十六歲嘅年紀，但已經唔係個搏人注意嘅男仔。

「原來我唔出聲，就真係無人會注意我喇。」



我莫名奇妙咁覺得鼻頭一酸，因為我知道，啱啱牆上嘅眼珠，其實就係嗰啲因爲吳非凡嘅譁眾取寵而得嚟嘅，轉瞬即逝嘅視線。

電視上嘅吳非凡隨住時間流逝長大，但已經好耐無見佢講過野，只係好似幽靈咁喺人群中默默無聞、低頭行路。

就好似，變翻一粒無人留意得到嘅街邊小石。