[有沙入眼]是咁的，我覺得我住嗰度有啲唔妥: 44路邊嘅石頭

電視播放出一個細路仔，戴住巫師帽，披住黑色透明披肩，右手挽住一個南瓜膠兜。佢耷低頭，另一隻肥手仔就捉住自己嘅短褲管。

環視周圍，會見到佢身邊有好多唔同嘅小朋友扮鬼扮馬，有用廁紙卷成嘅木乃伊、痴髮菜上塊面嘅狼人、搽咗茄汁嘅吸血鬼等等。每個小朋友都好享受一年一度嘅萬聖節活動，好乖咁排隊問老師攞糖。

而佇立原地嘅小巫師，唔駛問都知係吳非凡，估唔到佢細個又幾得意。

佢話，幼稚園慶祝萬聖節嗰日，就係佢第一次覺得，眼前嘅歡樂將佢排斥咗出嚟嘅日子。

原來就算自己打扮成點，都無納入過其他人嘅眼中。



做咗咁多年人，我地喺成長過程之中總會有幾個點諗都醒唔起叫咩名，或者記憶中嘅面目已經模糊一片嘅同學。依種人嘅存在就好似街邊唔起眼嘅石頭一樣，太過平凡、毫無特色，無任何人留意。