[有沙入眼]是咁的，我覺得我住嗰度有啲唔妥: 42吳非凡

肥佬個啤酒肚已經壓扁咗一半，無時間喇，但係我嘅記憶仲係好模糊。

咪住，我同佢有共同回憶？咁即係我地本身係識嘅，唔怪得關鍵字係我個名！

「喂肥佬！你叫咩名！」我靠近透明牆大嗌，用盡哂我全身嘅力去嗌，希望佢聽得到。

「呃？係咪有人！救命呀！救我！」

得咗！佢有反應！



透明牆繼續壓過去，我亦把握時間再問：「你叫咩名！快啲答！聽唔聽到呀！問你叫咩名呀！」

「呀頂！忍唔住喇！」

肥佬個肚受到過度壓逼，搞到佢喺咁「呠呠呠」放屁，一陣千年宿便嘅惡臭沖入鼻腔，我忍住反胃嘅衝動，淨係重覆問佢叫咩名。

「答我呀！你叫咩名！」

「我⋯⋯我叫吳非凡。」