[有沙入眼]是咁的，我覺得我住嗰度有啲唔妥: 34曲金鉉

當我入到四眼肥佬屋企，當堂嚇一嚇，因為佢屋企設計雖然同我嗰間一樣，但屋內嘅牆就好唔同。

視線所及範圍嘅牆身千瘡百孔，數之不盡嘅圓窿好似蓮蓬咁。有啲窿鑿得比較深，有啲比較淺，但咁嘅家居環境已經足夠詭異。

詭異到我對眼前啱啱先救完我嘅肥佬起咗戒心。

「點解⋯⋯你要鑿牆？鑿咁多窿？」佢鑿牆搞到有噪音已經唔係第一日嘅事，我好清楚牆上每個窿都係佢鑿，我只係唔知道原因。

肥佬放低錐同鎚，入廚房拎咗兩杯水出嚟，佢示意我飲，但我話自己未口渴。



「咁你點解會開門睇屋外面？」我轉移問題，因為爭論我係憑空出現定一直喺原地根本無意思。

「咪就係聽到咩幫我、幫手咁，所以就出嚟睇吓。」即係話肥佬無聽到我問候伯母，而係對「幫我」、「幫手」依啲字有反應。點解呢？

「其實我想問嘅係，依度嘅住客因爲紅衣女鬼嘅傳說，無論夜晚走廊幾嘈都唔會有人理。點解你⋯⋯」我正想問落去，竟然比肥佬反問一句：「咩紅衣女鬼傳說？」

我有啲驚訝：「你新搬嚟？」

「我住咗喺度好耐喇喎，無聽過。」



記憶即刻有啲混亂，我係由幾時開始成日聽到有人鑿牆嘅呢？仲有，紅衣女鬼傳說⋯⋯係邊個講我知架？

算，唔深究住，總之結果係好彩佢無聽過個傳說，所以先救到我。

「唉，好彩你唔知。點都好，多謝你救咗我。」

肥佬摸一摸自己個半禿頭，有啲唔好意思：「唔好咁講。係喎，講咗咁耐，你叫咩名？」

講起上嚟又真係未自我介紹，我正想將自己個名講出口，就窒咗窒，情況有啲似執筆忘字，但好快又記翻起。



「金⋯⋯」

「金？」

「我叫曲金鉉。」

依個時候，四眼肥仔望實我，好似靈魂出竅咁，完全無哂表情。

沈默嘅壓力令我呑咗啖口水。