[有沙入眼]是咁的，我覺得我住嗰度有啲唔妥: 33入屋

血水四濺，怪手僅餘嘅肌肉全部萎縮，化成一條白骨。擺脫成功嘅我抽翻隻腳出走廊，而肥佬亦幫我閂埋大門。

「唔⋯⋯唔該哂⋯⋯」我抖哂大氣，但都不忘講多謝同道歉：「幫我同伯母講聲對唔住。」

肥佬聽到一頭霧水：「你識我阿媽？」

「吓？你無聽到我屌你老母咩？」

「咁重口味？無喎。」睇嚟佢誤會得好透徹，我意思係爆粗鬧你，唔係真係同伯母有關係好無？



「你聽唔到我爆粗？」我見肥佬皺眉擰頭，又問：「咁你聽到咩？」

「聽到⋯⋯好似係⋯⋯幫手？幫我？咁上下啦，但其他就聽唔到喇。」

「吓？我嗌咗好耐救命喎！」

「我諗你都係，但我真係聽唔到。啱啱嗰隻係咩嚟架？」肥佬將錐同鎚以左手揸住，空出右手伸過嚟，我捉住借力起身：「唔該。啱啱嗰隻係乜，你問我我真係要問下叉燒炳。」

「入嚟我屋企先再講。」



我望一望自己屋企，又望吓兩邊走廊，陰風陣陣令人頭皮發麻，於是我就跟咗肥佬入屋。

入屋前，眼角好似見到走廊盡頭，有舊肉色野踎咗喺地吓⋯⋯