[有沙入眼]是咁的,我覺得我住嗰度有啲唔妥: 24肉泥
令我變成咁嘅原凶,喺廚房伸出微笑嘅頭顱,無人類感情嘅眼球注視住我。
「你訓咗幾日幾夜喇,唉,蘇蝦仔係要訓多啲嘅。食野唔食呀?」阿婆用極度溫柔嘅語氣,好似安撫BB仔咁,但佢嘅聲線令我覺得更加心寒。
「啞啞啞啞啞啞……」我喺床上掙扎,斷手斷腳不停揮舞,然後我先驚覺自己變成咗乜野。
阿婆整啞我,抆哂我啲牙,斬斷我過長嘅手手腳腳,係想將我還原。
還原翻做一個BB仔。
「食多啲野先會快高長大架。」
阿婆捧住一碗發臭嘅肉泥,用匙羹匹起,拎到鼻前索咗一啖︰「嗯~好香。」
阿婆拎住碗肉泥行到我面前,將我抱起,棟喺床邊,然後將匙羹上嘅異物隊到我嘴邊。
好似豬內臟混合血腥嘅惡臭肆虐咁鑽入我嘅嗅覺神經,令胃袋收縮,將入面僅餘嘅胃酸都嘔埋出嚟。
強酸燃燒食道,令口腔變得灼熱。
「哎呀,又嘔奶。」阿婆放低個碗,拎紙巾幫我抹嘴。
「點解咁嫌棄?你自己啲肉嚟架喎。」聽完依句,我就知啱啱碗肉泥係嚟自我啲手腳。
「啞啞啞。」我企圖反抗,但係徒勞無功。
「阿婆驚你痛,已經幫你打咗麻醉針架喇。阿婆驚你流太多血,已經聯埋你啲傷口架喇。點解你咁都仲唔滿意?」
幫我抹嘴嘅手愈嚟愈大力,甚至已經係壓落我個嘴度。
「我一路等你,點解你唔翻嚟!」