[有沙入眼]是咁的，我覺得我住嗰度有啲唔妥: 21你唔好走啦

阿婆聽到老人嘅聲之後就放開我隻手，個頭九十度歪向一邊，睇住我身後嘅老人，好難得咁感覺到佢好似有啲好奇。

我轉頭，就見到一個拎住拐杖，光頭駝背，拎住拐杖嘅老人家。年齡應該係六十幾七十歲左右，睇落好脆弱，面上嘅表情好似歷盡滄桑咁。到底依個老人家以前經歷過一個點嘅人生，雙眼先至會變到一片死灰？

如果要用一個詞語形容佢個樣，大概就係「絕望」。

阿婆好似有少少驚，身體轉向就開鐵閘入翻自己屋企。佢個頭，直到閂門嗰一刻，都係訓矮頸咁呈九十度。

老人家細細步細細步咁喺我身邊經過，我覺得自己好似比佢救咗一命咁，所以情不自禁同佢講咗句多謝。



老人家聽到我嘅道謝，慢慢轉身，用嗰對毫無光澤嘅眼珠望住我，然後又因為睇唔清楚所以突登靠近啲。

「唔駛多謝，反正你最後都係會死。」

「乜話？」

老人家無任何回應，無再望我，繼續一步步向前行。

佢一路行，一路話︰「記得起就唔駛死咯，記唔起就要死咯。記得起都要死咯，記唔起都要死咯。無咯無咯。」



我行前兩步已經超過咗佢，無啦啦話我最後都會死，唔問得清清楚楚真係今晚屙屎都唔安樂。

「點解我最後會死？」

「人終需一死，無其他意思。」

右方嘅門再次打開，一碌木棍由上而下兜頭劈落我天靈蓋。

「你唔好走啦。」喺我意識畀黑暗吞噬之前，最後聽到嘅就係阿婆毫無感情嘅哀求聲。



如果可以，我都唔想走。