[有沙入眼]是咁的，我覺得我住嗰度有啲唔妥: 20老人家

我嚇一嚇，「吓」咗聲，然後搖搖頭，用力眨眼，再望個水錶。

「咦？」依個時候，上面表示嘅已經變翻正常數字。與此同時，阿婆「嘻」咁笑咗出嚟，好似萬聖節嘅巫婆音效。

我望向阿婆，完全無表情嘅面皮就喺眼前半吋嘅地方，圓碌碌嘅眼珠入面反射住我驚魂未定嘅神態。

「嘻嘻，好似我乖孫。」

「咩話？」



「你嚇親個樣，好似我乖孫。」

嘴角向左右拉展，微微上彎。

個笑容，令我打咗個冷震。

「我丟垃圾先喇。」我隨口講句野諗住閃人，點知隻手突然畀啲冰凍嘅野捉實。

阿婆粗糙嘅手心令我手腕極度唔舒服，我下意識掙扎，手腕即刻傳嚟畀沙紙磨咗半圈嘅疼痛。



但令我訝異嘅唔係磨擦嘅不適，而係阿婆嗰隻毫無溫度嘅手，我好似畀屍體捉住咁。

阿婆指一指我屋企門口，門前就放住我袋垃圾。阿婆無再笑，嘴角嘅弧度消失，瞳孔入面無任何人類應有嘅神彩。

「你做咩呃我膝頭哥唔食辣椒醬呀？」

喺例得村，只要放袋垃圾喺屋外面就會有人收。所以我啱啱講嗰句野就好似晴天嗰陣話要翻屋企收衫，因為怕衫褲會比雨淋濕一樣。

我企圖掙扎，但係佢隻手嘅力量非同尋常咁大。



「阿婆隻手仲好好力水。」

唔知點解，聽到依句說話，我嘅恐懼有一瞬間灰飛煙滅，只感覺到莫名奇妙嘅一陣鼻酸。

「唔該借借。」正當我仲奇怪緊點解個心會有種咁嘅感覺嗰陣，身後傳嚟一把沙啞嘅老人聲。