[有沙入眼]是咁的，我覺得我住嗰度有啲唔妥: 11衣櫃

衣櫃之中嘅異物湊近，眼珠幾乎要逼出門外，眼眶受壓，擠出黏膜之中嘅鮮紅血水。

血液順住櫃門流到地下，眼珠已經突出到見到固定眼球嘅粉紅肌肉組織。

我發狂咁大叫一聲，又唔夠膽行近衣櫃，於是隨手將手上把刀丟出去，

刀刃喺半空翻滾，劃出完美弧度，降落插咗喺櫃門上面。

嗤。



無機木材竟然因為刀尖嘅插入而噴出血花。

「好痛呀呀呀呀呀呀哈哈哈哈哈！！！」

我將手放喺大門嘅門鎖上。

同一時間，佢亦伸出慘白嘅手指，勾喺衣櫃門邊之上。

「咔。」由於我屋企用舊式木衣櫃，突然用力拉開會卡住，而佢亦因為咁出唔到嚟。



不過櫃門又開咗少少，大概係一隻成人手指公嘅縫隙之間，昏暗嘅空間有一道瘋狂嘅寒光一閃而過。

「哥哥唔同我玩⋯⋯」佢失望咁嘆息，然後收翻慘白枯萎嘅手指。

執翻條命仔嘅我即刻呼出谷喺肺入面好耐嘅長氣，心臟嘅跳動強烈到令胸前肌肉都發痛。

「無⋯⋯事喇？」我放喺大門門鎖嘅手微微放鬆。

視線環視自己嗰間豆潤咁細嘅公屋單位，確定再無異樣，我先真係安心。