[有沙入眼]是咁的，我覺得我住嗰度有啲唔妥: 3肉色野

其實我由細到大都好驚聽鬼故，可能因為細個睇過午夜凶鈴同咒怨，搞到有童年陰影。雖然已經十幾年無再接觸，但有時諗翻起嗰兩隻怨靈都會打個冷震。

唉，半夜真係唔好自己嚇自己，快脆沖涼訓好過。

講真，我一早覺得間屋嘅氛圍令我周身唔聚財，但今日個不安感係莫名奇妙咁放大咗。

行入廁所，開花灑，腦入面就突然浮現翻啱啱踎喺走廊盡頭嗰舊肉色嘢。

我同佢嘅距離大概係五十米，走廊嘅燈光本身就唔係咁夠，所以睇得唔算太清楚。



有時，突然面對一啲無辦法理解嘅異常嗰陣，唯一能夠做嘅就係喺心入面用科學將異常合理化。

啱啱我諗，應該係某一家人罰個仔出嚟走廊之類，咁個細路唔開心，咪踎喺度囉。依個係最合理嘅解釋。

我合埋眼，任由熱水灑落我嘅身體上面。

咦？唔係喎⋯⋯

合埋眼，我腦海又浮現翻啱啱見到嘅影像。



唔係細路。

嗰舊野唔係細路。

應該話，連人都唔會係。

啱啱喺走廊盡頭嗰舊野，雖然背住我，但係兩隻腳向後拗，都係對住我⋯⋯

就好似以前睇奇幻潮嗰隻間場嘅怪物咁，一模一樣！



一諗到呢度，我就全身發冷，明明淋緊熱水，點解會咁凍？

一股腥味湧上鼻腔，我擘大眼，就發現本身射緊熱水嘅花灑對住我噴血。

「屌你老母！！！」我嚇到爆粗，即刻伸手去扭個水制。

沙沙沙⋯⋯

扭熄熱水。

沙沙沙⋯⋯

扭熄凍水。

沙沙沙⋯⋯



「點解閂唔到水喉！」我隨手扔咗個花灑落馬桶，即刻赤裸咁走出廁所，拎條毛巾抹身。

唔係講玩喎，真係血嚟。

我個腦第一時間諗到嘅，係報警。

然後我就知道，面對怪異，報警係無撚用。