[有沙入眼]是咁的，我覺得我住嗰度有啲唔妥: 2紅衣女鬼

據聞以前呢度住嘅一個居民，有一晚聽到走廊外面有尖叫聲，所以就好奇打開對住走廊嘅氣窗望吓咩事。

打開之後，就見到有個著紅衫嘅女人發晒狂咁喺走廊跑過，嚇到嗰條友連閂翻個氣窗都唔敢，即刻縮翻入床。

依件事一傳十，十傳百咁，後來又愈嚟愈多人見到嗰個女人，話佢一路跑一路叫，仲將個頭左右咁fing。

大家幻想吓伸條脷出嚟嘅腦魔BB就知佢點fing法。半夜見到個紅衫女人一路叫一路fing頭一路跑，都咪話唔恐怖。

後來開氣窗嗰個人就意外死咗，大家都覺得係因為佢望過嗰個紅衫女人。



雖然無人去確認，但普遍嘅居民都認為嗰隻係女鬼。

自此，喺呢度住嘅人就有個潛規則。

夜晚聽到咩聲都好，千祈唔好多管閒事。