<測謊眼>唔洗呃我啦，我一眼睇得出你係唔係處女: 4
每當同女朋友嗌交既時候，我都會搵佢呻，佢有咩唔開心都會搵我講，我見証過佢同兩個男仔拍拖，兩次分手都喊到豬頭咁樣。我地有好多共同話題，性格其實都好相似，識到佢呢個紅顏知己真係三生有幸。我唔知道男女之間係唔係真係存在純友誼，不過我就唔夠膽否認話對芷芊一啲好感都無，但我唔會特登去分究竟果樣係友情定愛情，我只需要知道有咩界線係唔可以超越就夠啦。岩岩識佢既時候，佢岩岩開始左佢既初戀，到佢分手既時候，我已經搵到我心愛既女朋友。可能係Timing既問題，亦都可能係我地兩個都無勇氣去跨越朋友既界線，因為我地都怕，我地都怕會因為咁而失去一個永遠都唔想失去既好朋友。我唔會話佢比女朋友更加重要，但芷芊係我心目中既地位的確係無可取替既。諗諗下，原來上一次食飯已經係三個月之前既啦，唔知你而家過成點呢？唔知你會唔會講真話我聽你係唔係處女呢？我搵左張上次一齊去貓貓Cafe既即影即有相，望到背景入面既幾張凳，就覺得其實而家同芷芊既距離可能已經係最好既位置。係我集中精神之前，我反問自己究竟會想唔想芷芊係處女？哈哈，其實都無話想唔想既，我都係專心望住張相算啦。望左好耐都見唔到紅點，莫非芷芊真係處女？原本係有打算同佢confirm，但而家知道左佢可能仲係處女，我竟然覺得問佢呢個問題會冒犯左佢。睇黎，我都係拎女朋友send比我既朋友相你驗證好啦。呢個時候收到Wendy既回覆，佢含羞答答咁回應我：「係呀...你唔好周圍同人講呀。」「唔該曬你呀，得閒請你食飯！」「喂你有女朋友架啦啵！」「我對你無興趣呀哈哈唔好誤會~」「好啦，加油做你個研究！」如果我同Wendy講真話既話，佢又會唔會信我呢？