男校生活史･回到起點: 第二章 回到校園2

「我想問清楚你究竟知唔知自己講緊乜嘢呀! 你就當然唔使驚啦, 有港隊照住你, 有Head pre依個職銜照住你, 你3322咪入到大學囉。你估我哋係你咩, 我又唔係同緊你講嘢, 過主啦。」所以話一個幾出名嘅人都好, 都總有一個唔鍾意你嘅人喺你身邊。

我冇出過聲, 只係默默咁行開咗。

每一個有關校園嘅故事, 都總係有呢一句嘅存在: 「學校係社會嘅縮影。」呢個社會好現實, 你爬得越高嘅位置, 人哋就會妒忌你。佢哋唔會睇你過程努力咗幾多, 佢哋只會望到結果。雖然我唔係講緊全部人都係, 但係身邊就仲有呢啲人嘅存在。

眼瞓嘅我仍然眼瞓, 話說琴晚要搞掂份通識 IES, 要寫一份成萬字嘅報告實在一啲都唔簡單, 知唔知要我飲左幾多杯咖啡先可以精神少少。

「喂! 阿敏你咁遲返㗎, 你做曬今日要交嗰啲功課未呀?」當時我個同學講完呢句之後, 兩個班主任即時望住我。





「一早做曬啦, 你唔係未做呀嘛, 你唔好抄我份功課呀, 我做得好辛苦㗎。」呢一刻, 我要扮得好平常, 好精神咁樣對住條粉腸講。
 
正所謂「閘住, 反彈, 無回頭」, 當然佢唔會再出聲啦。

我叫得佢做粉腸, 都只係勝在我哋夠friend姐。我同佢出生入死咗6年, 好鍾意一齊出街玩, 出街Hea。雖然佢份人比較正經, 但係佢真係好善解人意, 我有咩唔開心佢都會開解我。

佢叫做陳以諾, 通常我都會叫佢英文名Johnny。佢高175cm, 畀我高大約2 cm。由中一開始, 我哋都會一齊參加好多活動, 可以話係......好朋友囉。
 
「你兩個唔好喺度曬恩愛啦, 個班房夠光啦!」讀男校, 一日唔埋半日就總會聽到呢啲咁嘅嘢, 所以對一個讀咗五年男校嘅人嚟講, 都已經唔想再反駁佢地。
 




「Let stand for the morning school prayer. In the name of...... 」搵耶穌嘅時間又嚟啦。逢親早禱嘅時候, 大家都十足十扮得好似殭屍一樣。真係有咁攰咩? 係㗎都幾攰㗎。唔知各位讀到高Form未呢? 未到嗰一個階段你梗係乜都唔知啦! 小朋友你未長大呀。
 
平時星期一, 都係一星期最黑仔既一日, 不過今日除左番學果一陣, 總算平淡無奇。
 
而有D事我地總會習慣成自然, 就如例行公事, 已經融入咗我哋生活嘅一部分, 就係問人食唔食lunch。
 
「今日食唔食Lunch呀你地？」我問。
 
「好呀你中意」Johnny好似好專心咁喺度抄緊Notes。
 




「乜你唔食飯架咩, 我就一定食既」佢把聲真係好鬼尖, 成個太監咁
 
我呢三個friends就係好中意執我字眼, 再言之有理咁講……
 
「好囉……咁你同唔同我食飯呀, 呀Scanner！」我有點不耐煩咁講。
 
「俊敏哥, 你咁多Booking, 咁難得同你食飯, 係我榮幸啦係咪呀!」聽到呢啲咁嘅講法, 簡直覺得係虛偽個虛偽。

 
<故事待續......>

.......................................................................................................................
如果大家覺得好睇就留個言啦​! 支持一下小弟​~​
18/12/2016: 第三章