男校生活史･回到起點: 第一章 回到校園

「下一站置樂中學, The next stop is...」

 今日星期一, 又係返學嘅日子, 同學們喺車上面當然瞓到成隻豬咁嘅樣。我攞起書包, 離開座位, 順便拍醒其他幾隻「豬」, 再蓄勢待發準備落車。

 08:13am 

「下一站翠湖花園, The next stop is Ravana Gar...」 

「停車呀司機! 停車! 停車呀!」我破口大嗌。 





「㩒鐘落車呀靚仔, 成班都有問題...」
 
所以話, 笨開有條路, 未瞓醒嘅後果就係大家都會係咁蠢, 無分階級, 無分年齡。

落到車再望一望錶「08:14am」, 好彩下一站同我哋學校個站唔係太遠距離, 假如下一站上咗高速公路, 睇嚟都冇人救到我哋啦。

 「我哋仲有一分鐘嘅時間呀! 快啲啦! 」一分鐘? 係呀, 一分鐘之後就遲到啦。

每一間學校都總有啲咁準時嘅人, 未到最後一分鐘, 就唔會踏入學校門口, 準時嘅真正意義莫過於此。 





「今次一分鐘耐力賽嘅起跑線在於校園500米外面, 大約有六位嘅學生而家起跑喇, 今日出賽嘅有一位Form3, 三位form4同兩位Form5。好啦, 睇到仲有半分鐘嘅時間, 佢哋仲有200米直路上隧道口再轉個彎就到!」我心想。 

不過真係好可惜, 因為今日冇老師同場競賽, 否則一定精彩精彩。

 「叮噹叮噹、叮噹叮噹......」鐘聲隨即響起, 我亦完成了今場的比賽。

 「好早返嚟喎 Head pre...」我對住嗰一位嘅prefect微微一笑, 跟住衝左上班房。

 系啦都未自我介紹自己添。大家好, 我叫黃俊敏, 好多同學都叫我「阿敏」。基於阿敏呢個名又好似女仔名, 佢哋就好鍾意叫我「女神」。唔知你哋身邊, 有冇一位同學有幾百萬個花名呢? 我都幾咁信其中一個就係自己。





 對於人哋叫我乜嘢花名, 其實我都冇乜所謂, 不過對朋友嘅說話, 有時真係唔可以亂講出口, 唔係個個都鍾意自己嘅花名。
 
其實我今年中五, 亦實實在在係呢一間學校嘅Head Prefect。我亦中好鍾意喺學校搞活動, 做搞手。 

「哎呀, 下年就考DSE啦! 其實上到高中嘅生活真係好辛苦, 日日唔係做功課就係操卷。望住自己嘅目標, 真係一步一步咁沉入谷底... 」正當我上緊課室嘅時候, 隔籬有兩位同學就喺度依依哦哦咁講嘢。 

「DSE? 擔心? 擔心乜嘢呀, 冇嘢嘅! 仲有時間喎。」我無啦啦走去插嘴, 嬉皮笑臉咁同佢哋講。

 嗰兩位同學即刻把起火...... 

<故事待續......>

.......................................................................................................................
如果大家覺得好睇就留個言啦​
16/12/2016: 第二章