失戀200天後,我遇上的女孩們: 第二十八話

「點解我會係度既?」我係個心度問緊自己...
身處係五光十色既酒吧,落寞既我就好似一套白色西裝上既一點灰塵,雖不顯眼但總有點阻礙。今晚,我自己一個嚟到蘭桂坊,身邊無Eric同Peter,我只係企係一角隊緊啤酒,掃視個場,睇緊啲女波來波往。
「兩點鐘方向,開胸直髮飲到咏緊,再多兩三支應該冧!」無啦啦隔離有條友好似同我講野,咁我向佢指住自己,問佢係唔係同我講野...
「哈哈...我以為你係想執屍添,哈哈...」眼前個男人黑黑實實,雖然唔算高大,但都睇得出佢平時有健身做運動既。
「喂,烏鴉,仲以為你媾到個護士就唔嚟,係屋企玩制服添!」身後個酒保突然插嘴,原來佢就係Eric口中既執屍隊隊長烏鴉!
相對比執屍隊隊長,護士女朋友反而更吸引我。根據專業分析(其實係我),AV有四大制服職業:空姐,護士,OL同女教師。亦根據專業分析(亦即係我),依四大職業咁吸引男人地方如下:
空姐:主要係離地感,令男人有更多幻想。
護士:因為職責係照顧病人,而令男人憶起母愛迷戀。
OL:因為衣著關係會令人覺得高人一等,當征服到後,成就感更大。
女教師:出於兒時既報復心態。




以前我曾經有幻想過會媾到以上職業...
話題好似扯得太遠...
「咁食得多煮家菜都要食下出面野中和下嫁!而且佢要返工!咦?你老細呢?」
「呢...果邊攬緊女!」佢地口中既老細就係阿Sam。
見到阿Sam左擁右抱,就諗起當日既Tracy,心裡卻有份無名厭惡,但諗深一層自己何妨唔係傷害過Tracy。講到尾,我同阿Sam都係濺人,分別在於佢有錢我無...
「你識阿Sam嫁?」烏鴉問我。
「朋友個朋友,見過一次面啫...咁你唔過去?」
「佢媾緊女,費事啦!」
於是我地兩個就一路劈酒一路睇女,由於有共同朋友又有共同語言(女同波),我地都傾得特別投契。當我地飲到咁上下,又係時候講再見。我地出到酒吧門時,見到頭先個開胸直髮烏左係欄杆度,好似好辛苦咁...
「點解個情景咁熟既?」烏鴉自言自語。




「講咁多做咩?扶起佢先講啦!」
於是我地夾手夾腳將個女人扶起身,與此同時...
「你個色狼係度做咩呀?」一把女聲係後面傳來,一個啤酒樽亦從上而下扑落嚟...
「樽下留人!」講既係烏鴉,佢雙手亦擋下酒樽,點解佢咁勇?因為酒樽個目標係佢囉!
「你條友!我都知你會趁我返工時出嚟搵食嫁嘞!好彩我廣佈線眼,事前又調左更,今次你仲唔人贓並獲?」原來佢就係烏鴉個護士女友,邊個話護士一定斯文嫁?
「你聽我講先啦...」
經過一輪解釋同擾攘之後,阿女友都接受左烏鴉既道歉,而烏鴉亦都被女友扭住耳仔離開...
「小心個肚呀...」
「多事!」
被我地扶起個女仔啱啱酒氣過左,咁我就買支水俾佢等佢舒服啲。




「嗱!好返啲未呀?」
「唔該!好返好多嘞...」望住個女仔個樣其實有少少似Tracy,但最大分別既就係身材,再加上佢著緊件開胸衫...我無辦法將視線移離佢條又深又長既事業線...
「你自己一個呀?下次小心啲呀,自己一個好危機嫁,下次唔好飲到咁嘞!」我連珠炮發,盡量將注意力從佢事業線移開,亦有助舒緩下身既充血狀態。
「嗯!總之唔該你,你叫名呀?」
「Jack...」
「Jessica...」
「哈哈...咁啱又係J字頭,哈哈...」
「好嘞,你得唔得呀?使唔使我送你返去?」我陪佢坐左一陣,見佢無咩野就起身準備走。
「你唔係想咩咩咩?」
可能啲血集中左係下身,令腦部唔夠血運作,一時唔明佢講咩...
「出得嚟玩...你唔係扮純情嘛?」佢一語突破盲腸,隻手更掃去我屁股度,令我下身更繃緊,跟住既劇情都唔講太多廢話...
完事後,我地都無訓,就係張床度傾計。我地傾左好多野,開頭佢問我開頭點解唔打算搞佢,跟住同佢講我感情既問題同煩惱(根本無必要呃佢),雖然佢都有講佢既煩惱,但我睇佢個樣都係半信半疑。今次我同佢都無交換電話,佢話:「一夜情呢家野,一個對手一次就夠,唔好太認真!」
盼望你沒有為我~又再度暗中淌淚~
我不想留低~你的心空虛~
盼望你別要讓我~像背負太深的罪~




我的心如水~你不必痴醉~