失戀200天後,我遇上的女孩們: 第二十二話
「你呢排好多野煩呀?」兩個女人,竟然又係唔同時間,唔同地點,問出同一個問題,我諗個或然率仲難中過六合彩!
「唔係啊...」罐頭答案...
「你塊面出賣左你呀,講出來俾我聽下!」或然率再次降低,係時候買六合彩喇...
唔通我講俾你地聽我一腳踏兩船,最近又同前度上埋床咩?你地咁啱又係揸住隻叉,我唔想成為某一日既報紙頭條主角!
「成日收埋啲係個心度,有時都唔知你諗咩...」依句得Tracy講啫。
「諗你(唔著衫)囉...」
「口花花...係喎,上次你個fd點呀?」
「吓?佢無野,不過上次搞到好夜,無時間覆你,對唔住呀,要你擔心...」
「唔緊要...男定女嚟嫁?」吓?我差啲成啖水噴去佢度...
「女...」以退為進...
「嗯...」佢露出滿意既笑容,我諗應該過骨掛...
不過講起Belle,我已經有個幾禮拜無同佢聯絡,連whatsapp都唔覆我,唔知佢係唔係有心避我呢?
「你新年係唔係返大馬?」
「嗯...係auntie叫我返去,佢話始終都係一家人,新年最好齊齊整整一家人過喎!」
「嗯...」提起佢auntie,我就諗返起個張睇唔起人既嘴臉...
「你會唔會掛住我嫁?」
「唔會嫁,所以你要快啲返呀,唔係呢...」
「唔係咩呀?」佢手托住腮,瞇起雙眼,散發出性感既氣質,令我既血液開始流向下身...
「無...無野,食野喇...」我飲啖水,深呼吸去舒緩下身既繃緊...
「上次咪見過囉,做咩又要見呀?」Mandy食左啖意粉,後知後覺講:「咁...即係代表咩呀?」
「無呀,你唔想既我叫阿媽唔使預你囉,橫掂都係佢叫既...」
「邊個話唔嚟呀?」同樣既姿勢,唔同人做,散發唔同既氣質,今次係清純可愛,同樣令我血液向下流...
「咁即係嚟喇!咦?我使唔使去你屋企呀?都未聽過你講屋企啲野。」
「我屋企...咪同其他人一樣囉...」佢個樣好似有啲難言之隱...
我地埋單之後,就手拖手送佢返屋企,一路上佢都無出聲...
「其實你信唔信結婚...會一生一世嫁?」到左佢屋企樓下,佢突然問我...
「信...」我諗依個係標準答案掛,不過自從Belle同個有老婆既男人一齊時,我確實有動搖過...
「嗯...其實呢...我父母係我小五果時離婚,雖然之後媽媽再婚,但個男人對我地兩母女都唔好,過左兩年後又離婚,所以我對男人既印象都唔好,直到遇上大我兩年既學長...」Mandy娓娓道來,眼神流露出悲傷,不竟依段都係唔好既回憶...
「佢係你初戀?」
「其實都唔算得上初戀,果時高年級會幫低年級補習,佢對我幾好,有時放學又請我食野,咁身邊同學都話我地拍拖,但佢無講過鍾意我,而且之後佢都同另一個同佢同班既一齊...」
「噢...咁你中學果時無人追你咩?」
「唔係無既...不過果時都無考慮過拍拖啲野。直到中二果時,被坐隔離個男仔吸引左...其實開頭我地成日鬥氣既,但漸漸了解佢之後,就覺得佢幾得意,於是就拍拖,可惜只係維持到半年左右,中三就分手...」
「佢玩玩下?」
「咁又唔係喎,可能我果時唔識拍拖,成日將啲醜態俾佢睇,趕走左佢掛?不過之後...」佢突然露出又甜蜜又邪惡既微笑,「唔知係唔甘心定係咩野,我對佢進行左瘋狂報復...」
「瘋狂報復?」我個腦幻想緊佢揸住皮鞭著住SM裝個樣...
「例如破壞佢出貓計劃,收埋佢啲功課咁...仲有一次,我擺左隻咸碟係佢櫃桶度,仲要報串俾阿sir聽搜佢個位同書包,哈哈哈...」佢發出可怕既笑聲,我慶幸我唔係同佢同校同班,唔係我分分鐘俾人趕十次出校都有可能...
「隻碟你自己走去買嫁?你唔驚被人望咩?」其實我想問佢買咩劇情...
「驚呀...以前商場咪有間係女人睇鋪既,咁少人果時咪走入去求其攞左隻封面條女著校服又寫住中出既買囉!買完即刻袋返落袋度,一支箭走囉!」佢講果間鋪我有啲印象,無記錯我都有幫襯過。
「咁佢最後點?」
「我唔知點解佢可以過到骨,之後我都無問過佢...」佢低一低頭,跟住再講:「不過最離普既係...升中四,我為左要同佢同班,我特登考得差,令自己可以同佢同班...你話痴唔痴線?哈哈...」
「你對佢都好痴心喎,最後你地點?」
「會考之後,我地唔同校亦都疏遠左,係幾年前一次佢搞既班聚先見過佢。佢比以前瘦,跟住佢又好似失蹤咁無消息,直到收到佢封信...原來...血癌...」我用手抹去佢面上既眼淚,但無論點抹,淚水都不停流出。
「其實你地兩個都幾似...又係比較內向...鍾意搞下笑...又咸濕...但對人好真誠...」
「所以我地先得到你既愛囉!」
「對唔住啊!上次探病,我唔小心睇到你對情侶介指,我知對介指...」
「其實對介指係...」我搶先講左我同Belle分手既事,Mandy係第一個由我親口講出來既人。講完之後我個心舒服左好多,或者我以前應該搵人傾訴,咁我就唔使傷心咁耐...
我送左佢上樓,正要分別時,佢嗌住我...
「喂,郭英偉!我個中文名叫林慧勤啊!記住呀!」
「哦!我會記住喇!林慧勤!拜拜!」