失戀200天後,我遇上的女孩們: 第二十話

「唉...佢而家無野做,成日係屋企話油道牆,叫佢整熱水爐又好似無件事咁...」大約過左個零禮拜,Belle差唔多日日都whatsapp俾我,講下佢工作點佢屋企點,但講得最多既係佢同佢個阿杰啲野...
「咁而家食飯邊個俾?」我比較想知道錢方面...
「我囉...佢有兩期租都係我俾,佢話借住先,佢話遲啲追返筆錢就還俾我...咁我見我地都住埋一齊...幫佢交租好正常啫...」
「咁佢話遲啲會做咩?」
「未知喎,佢話有個兄弟遲啲介紹份工俾佢...」
「嗯...」其實我唔係咁想知果個阿杰啲野,我比較關心Belle...
「咁你呢?你揀好未?」我終於同佢講左我啲野...
「仲未...我唔知點開口...你知我對每段感情都認真嫁嘞...」
「咁...唔同你講住做野先...」佢下線。
而家有第二個對佢好,其實我應該祝福佢,但呢幾日聽佢咁講我又有少少擔心。但我可以點?我已經唔係佢男朋友,或者我應該學習慢慢放低...




歷史一刻早已將舊伴侶轉送別人~我說~別傷心~
仍能恰當大方去做人~
仆街!邊X個播歌,仲要播正「阿牛」,拖佢出來斬!
正當我搵緊邊個播歌時,阿明既眼神同我接上,直覺話我聽佢而家既心情同我差唔多(唔係hehe)...
「個零禮拜前,我同阿Yuki咁啱撞到佢個fd,於是我地大家就一齊食飯,果時我都覺得唔妥,點知之後一次嗌交佢爆響口講果個fd其實係佢前度,仲想同佢複合。佢話佢好亂,唔知點做,於是我就叫佢依照自己個心去揀囉...」聽完阿明講佢同佢條女既近況,佢既表情好容易睇得出...
「你...而家後悔?」
「佢已經有幾日無搵我,開頭我諗佢須要啲時間冷靜,但耐左就開始諗懷疑佢已經同前度係返一齊,又或者佢兩個都唔揀...」
「都係幾日啫,你唔好亂諗野啦...無野既...」
「有無野我自己心知既...」
「咁點解你唔主動搵佢啫?」




「我唔敢...其他野我都有膽做,但面對感情...」我第一次見到阿明咁苦惱,連平時會講既廢話都無埋。
「你傷心都要佢知先得嫁!你而家咁樣,佢唔知,最後你就鑽牛角尖,永遠都出唔返去,唉...」
我拍一拍佢膊頭,行返去做野。其實,我邊有資格話佢,我自己咪一樣...
「頭先套戲你覺得點?」我同Tracy係戲院出來,佢立即問我依個問題...
「唔...都唔錯既...」頭先係戲院我掛住探索佢既身體,套戲講咩我都無太留意,而且我本身對愛情片都無咩興趣(愛情動作片除外)...
「你覺得女主角應該揀邊個?」
雖然頭先無咩睇戲,但大慨劇情都有啲印象,套戲係講女主角阿靜本身就快結婚,而咁啱卻在工作上遇上初戀男友阿志,而未婚夫阿誠正正係阿志生意上既競爭對手,於是兩個就係生意及感情上正面交鋒。
「我覺得應該係未婚夫,雖然佢曾經係花花公子,而且又背叛過阿靜,但浪子回頭金不換,加上對阿靜都唔錯,又知道佢個心,我相信努力會得到回報既。」無可否認我係屬於理性派,我唔認同因為短短時間既感動,就推翻多年建立既感情...
「咁阿志唔好咩?雖然佢地分手係因為佢搞左阿靜個好朋友,但佢地分開左咁多年都仲係單身,即係代表佢仲鍾意阿靜嫁!」佢個語氣有少少激動...
「唉!其實兩個都傷害過阿靜...都係講果句:拍戲啫,認真你就輸了!現實邊有可能發生啲咁既劇情丫!」




套戲最後無講明阿靜揀邊個,最後果幕係講兩個男人係婚禮度打交,後尾知阿靜唔見左,兩個周圍搵佢,阿誠去左佢地個新屋企度,而阿志就去左佢地相識同表白既果間中學天台度。當佢地打開道門時,套戲就完嘞!依個導演係咁,拍親啲愛情片鍾意留白,唔知出碟會唔會有另一個結局,到時迫你買碟!
「係囉,拍戲啫...」我見佢有少少失落於是從後攬住佢條腰,點知換來一句:「頭先係戲院仲摸唔夠呀?」
但佢仍然俾我攬,仲捉住我隻手放係佢條腰度(以防我乘機周圍摸掛)。
當我送Tracy到佢屋企樓下時,電話響,接聽,一把極度淒慘既咆哮聲係電話傳來:「救命呀!你快啲嚟啊!...你走啊...唔好過嚟啊!」