女神話我考試排名高過佢 就滿足我一個願望: 第三十章

「走開呀！我要去睇林雪彤除咗口罩個樣呀！」

「屌你咪嘈啦！而家成條四樓走廊都係人呀！」

走廊不斷傳出打鬥聲同埋慘叫聲。

「哇！班仆街仔搞咩呀？」方野吉説。

「成班狗公衝緊過去望我呀妹呀……」我無奈地説。





「我又去望下先！」方野吉好奇地説。

「狗公，出面咁多人你點過去呀？」我問。

「山人自有妙計。」方野吉説。

然後佢爬窗出咗去……

爬窗……





白痴，但係實用。

希望佢唔好仆街啦……

~半小時後~

「我返嚟啦~」滿面春風嘅野吉爬窗返嚟。

「你條粉皮個樣咁淫嘅？你搞咩嚟呀？」我問。





佢唔會仆到傻咗掛……

「你個妹真係好靚呀，啱啱唔小心仆係佢面前，佢扶咗我起身呀！隻手好滑呀！」方野吉猥瑣地說，爭在未流口水。

「話你狗公真係冇錯，你睇下你個樣……」我無奈地説。

「咳咳咳……」方野吉調整自己嘅儀態。

呢個時候，老師都行咗入嚟。

「全部同我坐返埋位！」今次入嚟嘅唔係Miss.Wong，而係一個男老師。

「我叫張世明，你地可以叫我張老師，今年我會教你地中文。」張老師説。

「個老師睇落幾好人喎。」方野吉説。





「人不可貌相呀。」我説。

「你地上我堂可以隨便玩手機，我唔會理，但係其他老師見到就唔關我事。」張老師説。

又真係好似幾好人喎……

「你地上我堂可以瞓教，但係其他老師見到都唔關我事。」張老師説。

即刻有人喺到歡呼。

「話時話，點解我行上嚟四樓嗰陣見到咁多人瞓喺走廊到嘅？你地玩緊扮死屍遊戲呀？」張老師好奇地問。

「唔係呀張老師，佢地真係暈咗呀。」有人忍着笑説。





應該話張老師天真好的蠢好……

「咁使唔使抬佢地去醫療室呀？」張老師擔憂地問。

有個同學望一望個錶，然後講：「唔使啦張老師，仲有七秒鐘，訓導主任就會帶人上嚟㗎啦。」

我望一望隻錶，數咗七秒。

「抬哂佢地去醫療室，佢地醒嗰陣就俾份報告佢地寫！」訓導主任説。

嘩……準到你呢……

全班都用一個驚歎嘅眼神望住佢。

嗯……點解曉琳轉校過嚟嗰陣冇啲咁嘅事發生……





天外之音：仆街仔你好想有呢啲咁嘅事咩？

咳咳咳……

「好啦，邊個想做我地班嘅班長呀？」張老師問。

傻嘅先會舉手啦係咪呀……

「冇人舉手嘅話就投票啦！有冇人提名？」張老師又問。

我相信呢個時候一提名就會俾人投返，都係食花生算。

呢個時候，方野吉企咗起身。





喂！你想點呀？

「我提名林浩雪，佢份人好有責任心㗎！」方野吉說。

「好啦，咁有冇人和議呀？」張老師問。

應該唔會有人投我嘅……

~一秒後~

屌！做乜全班都舉哂手㗎？

「既然林浩雪同學咁受歡迎，就俾佢做我地班嘅班長啦！」張老師說。

全班歡呼。

你班仆街睇住嚟，我一定會報仇㗎！

「好啦，既然林浩雪做咗我地班嘅班長，就等佢決定埋其他職位啦！」張老師說。

全班即刻靜哂。

機會嚟啦飛雲！

我迅速揀咗幾個啱啱笑得最大聲嘅人。

「嗯……都差唔多啦，你決定埋班會主席就得啦。」張老師說。

「呢個職位一定係由方野吉做啦！啱啱佢一提名我全班就舉哂手，佢人緣一定好好，搞活動嗰陣一定一呼百應呀！」我說。

你今鋪仲唔死？

「哇！咁一定要俾方野吉同學做啦！」張老師説。

全班再一次歡呼。

方野吉對天哀號一句：「早知今日，何必當初呀！」

「邊個叫你陰我啫？自作自受呀傻仔！」我笑説。

「好啦，啲職位決定好哂啦，放學啦！」張老師說。

「張老師，離放學好似仲差幾個鐘喎……」某人說。

「咳咳……咁小息啦！」張老師尷尬地說。

----------------------
話說呢我發現，
喺ig更新嘅話啲字會癡埋哂一齊
跪求解決方法orz
希望更文速度可以加快啦~