女神話我考試排名高過佢 就滿足我一個願望: 第十九章-----雪和月的故事
「陳曉琳小姐，請問你願唔願意做我女朋友？」我喺人群當中跪低，攞出「月」之戒向曉琳表白。
周圍啲人都停低望住我地。
但係曉琳完全冇流露一絲感動嘅表情，取而代之嘅係厭惡嘅表情。
「唔好玩啦！快啲起身啦！」曉琳説。
佢......拒絕咗我？
「你......你唔信我？」我説。
「我根本就冇鐘意過你，我當你兵咋！」曉琳説。
全場一片嘩然。
唔會㗎......唔會㗎！
「呀！」我大叫。
我環顧四周，先發現呢到係我間房。
原來係發夢......
我望一望日曆，今日係2月14號，星期日。
經過我嘅努力，我最後揾到嘅係「雪」之戒。
哈......個名幾襯我。
望往枱面發緊光嘅「雪」之戒同「月」之戒，心入面開始擔憂。
如果曉琳好似啱啱發嘅夢，拒絕咗我，咁會點？
我冇唸咁多，爽手換完衫就出咗門口。
我約咗曉琳九點鐘喺地鐵站等，慶祝我地嘅「單身日」。
去到果陣大約係八點九，但係曉琳居然仲早過我。
「等咗好耐呀？」我問。
「唔係呀，我都係啱啱嚟到咋！」曉琳説。
「咁我地出發啦，第一站喺邊呀？」我問。
點解我會咁問？
因為我同曉琳分開設計行程，佢負責朝早，我負責下午。
「第一站我地就去.....海洋公園啦！」曉琳説。
「吓？你認真？玩到一個朝早咋！」我説。
「一個朝早夠玩啦！」曉琳説。
「whatever you say so......」我説。
其實唔止玩一個朝早，本身我就唸住下晝嚟海洋公園。
一入到去，曉琳就帶住我玩嚟玩去，從來都未嚟過海洋公園嘅我感到既新奇又有趣。
尤其係啲過山車，玩到我膽戰心惊，曉琳每次見到我玩完過山車個樣都會笑我。
「有乜好笑喎......」我望住已經笑到崩潰嘅曉琳。
「冇辦法，你個樣實在太得意啦！」曉琳説。
「......」
「行啦！仲有大把野未玩呀！」曉琳説。
結果過咗成個朝早，我地淨係玩咗唔夠一半嘅設施。
「點算呀......仲有好多未玩呀......」曉琳説。
「你自己話一個朝早夠玩㗎！」我説。
「唉.....我地下晝去邊呀？」曉琳問。
「嗯......就去海洋公園啦！」我説。
「好啦......等等先！講多次？」曉琳説。
「我話，我地下晝去海洋公園呀！」我説。
佢呆咗幾秒先反應到。
「yay！浩雪最好人！」曉琳就好似個細路女咁大吵大鬧。
朝早我地玩啲機動遊戲都玩到有啲悶，下晝我地就去玩返啲悠閒啲嘅遊戲。
好似拋銀仔，射公仔等等(其實一啲都唔悠閒)。
痴撚線，中大奬嘅機率仲細過我同雪彤搞兄妹戀。
就咁樣一直玩落去，不知不覺原來已經六點鐘。
「已經咁夜啦？再玩一個然後走啦。」曉琳説。
「好呀，咁最後一個遊戲就玩......摩天輪啦！」我提議。
呢個就係我計劃嘅最後一步！
摩天輪去到最高點之時，就係我表白之時！
「好呀！我想撘摩天輪好耐㗎啦！」曉琳説。
排隊排到我地果陣，我見到個接待員意味深長咁望咗我地一眼，好似知道我等間嘅行動。
「加油」佢對我做口形。
入到去之後，氣氛突然變得好尷尬。
「喺呢曉琳，你有冇聽過雪和月嘅故事呀？」我率先打開話題。
「冇喎，咩嚟㗎？」曉琳説。
「喺好耐好耐之前，每逢落雪果陣周圍都會黑漆漆一片，所以當時啲人都會好憎雪，因為會令到佢地失去光明。一落雪，啲人就會即刻用盡所有方法溶哂啲雪。當時月亮係太陽嘅寵兒，佢對雪嘅遭遇感到可憐，於是月亮向太陽要求，希望可以令落雪嘅時候有光。太陽就覺得好嬲，因為月亮居然講呢啲雞毛蒜皮嘅事。太陽將月亮驅遂出佢嘅領域，要佢只可以圍繞地球轉，令佢望住雪俾人唾罵，俾人溶解。」我説。
「咁跟住點呀？」曉琳問。
「月亮服從太陽嘅命令，望住雪一出現就消失。另一方面，太陽冷靜之後，開始後悔自己嘅舉動，始終月亮都係太陽嘅寵兒，但係已經下咗嘅命令唔可以更改，所以佢只可以遠距離咁幫月亮，由於太陽並唔知道雪幾時會出現，所以每逢夜晚佢就會發出光芒俾月亮照住雪。」我説。
「咁結局呢？」曉琳追問。
「當雪出現，啲人又唸住溶咗佢果陣，佢地發現今次可以清晰睇到雪嘅原貌，佢地覺得自己以前做嘅事非常愚蠢，因為雪真係好靚靚，佢地開始用雪做好多野。但係，雪始終都會溶，啲人開始將仇恨轉移，佢地咒罵月亮，喺到鬧緊月亮點解咁遲先出現。可憐嘅月亮就咁承受住世間所有人嘅咒罵，即使係咁，月亮都冇唸住為自己平反，因為連佢都以為，係佢令雪無法展露自己嘅樣。」我説。
「咁月亮咪好慘囉。」曉琳眼角泛起淚光。
「咁都唔算嘅，最後雪都發現月亮對佢做過嘅野，佢地就墜入愛河啦！」我説。
呢個時侯，摩天輪去到最高點，太陽亦都開始落山。
「陳曉琳小姐，請問你願唔願意做我女朋友，令我可以為你阻擋世間一切罵名，即使我會身敗名裂，即使我會粉身碎骨，我都願意做你嘅月亮，一直襯託住你。」我攞出「月」之戒，半膝跪向曉琳告白。
呢個時候，本身聽完個故事有少少想喊嘅曉琳，眼淚奪眶而出，佢拉我起身，緊緊地抱住咗我。
「我願意......我願意......」曉琳不停低聲説着。
「放開我先......有少少痛......」我説。
媽呀......我究竟講緊啲咩呀......
「sor呀，我冇心㗎。」曉琳説。
我將「月」之戒放喺曉琳嘅無名指度，曉琳又再流咗幾滴眼淚出嚟。
「點解......點解「月」之戒......發緊光嘅？」曉琳咽哽地説。
我喺衫袋攞「雪」之戒出嚟。
「呢隻戒指，我足足揾咗五個月呀。」我説。
「傻仔......我拒絕咗你咁啲戒指咪嘥哂？」曉琳説。
「為咗你，我願意。」我説。
「你邊到有咁多錢呀？」曉琳問。
「我問人借㗎。」我説。
「你問你房主借㗎？」曉琳繼續哭。
我笑而不語。
曉琳坐咗嚟我果邊，依偎喺我個膊頭到一直喊。
我就一直靜靜地拍佢膊頭。
好快，摩天輪就到咗站啦。
「曉琳，唔好再喊啦，到站啦。」我遞咗張紙巾俾曉琳。
佢用紙巾抹乾眼淚之後，我就拖住佢隻手行出摩天輪。
啱啱個接待員見到我地拖住手，對我地微笑咗一下。
「呀雪，點解個接待員對住我地笑嘅？」曉琳問。
「唔知呀，啱啱入摩天輪之前佢都對我笑過。」我説。
等等先......佢啱啱叫我做......呀雪？
媽呀我好開心呀！
跟住，我地靜靜地行出海洋公園，靜靜地撘車，氣氛勁尷尬。
「呀雪，啱啱你做咩唔落車呀？你走站啦。」曉琳説。
「唔緊要啦，送埋你返屋企先啦！」我説。
「好呀......」曉琳塊面即刻紅哂。
「話説你覺唔覺得個氣氛怪怪地？」我問。
「我都覺，個氣氛好尷尬......」曉琳説。
「明明今朝都仲好好。」我說。
我同曉琳都笑咗出聲。
「可能我地仲未習慣啦。」曉琳説。
「哈！」
好快，我地就落咗車，就嚟行到佢屋企果陣，佢叫停咗我。
「呀雪，你送到呢到好啦，費事俾我呀爸見到你啦。」曉琳説。
「好啦，咁我地聽日見啦！」我説。
「聽日見！」曉琳説。
跟住曉琳行嚟我面前，瞄住我咀唇鍚咗落去。
「拜拜！」曉琳説。
我仍然企咗喺到，回味緊啱啱果一吻。
果個......會唔會係佢嘅初吻呢？
---------------------
恭喜發財，利是逗來(雖然你地俾唔到我)
今篇打咗好耐，因為呢排實在太忙
希望可以出多啲文(我今年嘅願望喺一日一更XD)