女神話我考試排名高過佢 就滿足我一個願望: 第四章------比賽

返學既日子一日又一日咁過去，唔知點解，曉琳好似淨係對我一個表示友好既態度，搞到全班都好葡萄我。

「屌，林浩雪條仆街何德何能呀？同我既曉琳BB咁親近呀！」呢句係我喺學校聽過最多既説話。

我都有問曉琳點解，但係佢每次都會轉移話題。

「各位同學，下個禮拜就要UT啦，記得温書呀，好啦小息啦，goodbye class！」Miss.Wong提醒我地，然而我地班九成人都唔知下個禮拜就UT。

「goodbye and thank you Miss.Wong.」全班説。





「喂，你有冇温過書呀？」小息果陣，曉琳問。

「冇喎，我都係啱啱先知下個禮拜UT咋。咁你呢？」我答。

「一早温好啦！你都快啲温啦！」曉琳説。

「唔温啦，我都唔係讀書既料嚟既。」我真係唔想温書呀。

「冇人話你唔得，係你自己話自己唔得！」曉琳講出熊仔頭既經典名句。





「放過我啦！」我死都唔要温書呀！

「一係咁，我地嚟個比賽，如果你今次UT全級排名高過我，我就應承你一個願望，但係如果你低過我既話，你下次考試前一個月開始就要陪我温書！」曉琳開出一個條件。

「一言為定！」我答。

平時我唔温書咋，我一温？全級頭十都有我份啦！

嗯......一個願望？要咩好呢？到時先算啦！





於是我就成個禮拜都喺到温書。

全班都俾我既行為嚇親，佢地應該喺度唸：「條粉皮做乜開始咁勤力温書呀？」

的確，由中一開始我就冇温過書，功課都係請槍，我而家咁勤力温書，佢地緊係嚇親啦！

經過我成個禮拜既努力之後，我終於將所有科目都温好。

我地學校係將UT放哂喺一日度，考完之後仲要繼續上堂，即係話UT要連續考哂7堂！考死人咩~

考哂之後，全班已經攤哂喺張枱到。

但係曉琳仍然好精神咁同我講野：「喂，浩雪，唔好瞓啦，仲有兩堂就放學㗎啦！」

「俾我瞓下啦，我好眼瞓呀~話説你唔覺得果七份卷好難㗎咩？」我已經俾曉琳搞到瞓唔返，唯有同佢講野。





「好難咩，每份卷我都淨係用佐一半時間就做哂啦！」曉琳笑説。

有冇咁勁呀？

「既然你成績咁好，做乜入佐嚟D班既？」我問。

「咪係為佐......點解要話你知啫？」曉琳緊張地答。

咦......睇嚟有啲內情喎......

「嚟啦講比我聽啦，我想知呀！」我死纏爛打咁問。

「想下好啦，當你UT排名高過我果陣，你以知呢個問題既答案為願望，我咪同你講囉！」曉琳説。





「我先唔會咁大唗囉！」我説。

「大唗？我認為好豐富㗎喎？你想要咩願望呀？」曉琳問。

我梗係唔會同佢講啦，等我玩下佢先！

「嗯......我希望世界和平。」我笑説。

「下？呢樣野我做唔到，另一樣啦！」曉琳答。

「即係除佐世界和平之外，乜都得？」我問

「係呀係呀！」曉琳沒好氣地説。

YES！曉琳已經中伏啦！





「咁我想同你拍拖！」我鼓起勇氣地説。

曉琳聽到之後，首先呆佐一呆，然後塊面慢慢咁變红，佢用一個細到我差啲聽唔到既聲量説：「你話點就點啦......」

「YAHOOOOO！」我喺心入面大嗌，考得高過一個D班學生，容乜易丫。

但係曉琳喺跟住果兩堂都冇再同我講野，喺到扮瞓教。

點解我知佢扮瞓教？因為我見到佢塊面仲係紅到就嚟滴血咁既樣。

有冇怕羞到咁啊？

即使我地喺一日之內就考哂UT，啲卷都係要下個禮拜先可以俾返我地，唉......學校改卷既速度真係愈來愈慢啦。





好期待同曉琳比賽既結果呀呀呀~

其實呢個比賽一啲都唔公平，如果赢佐，我就可以有女朋友；如果輸佐，我就可以有機會温書，然後同佢再比賽一次！

我就唔信我同佢大約20場比賽都會輸哂！

我而家同曉琳既關係有一啲微妙既轉變。

平時我同曉琳對話果陣，佢聲量中等同埋冇乜表情，但係我而家一同佢講野，佢塊面就秒速變紅，足足要等成半分鐘先答返我，仲要以我差唔多聽唔到既聲量講野。

佢真係好怕羞呀~~~

雖然話就話未改完卷唔可以派返俾我地，但係Miss.Wong已經勁開心咁講話某兩位同學全級排名頭五，令校長大跌眼鏡。

屌你，又話未改好卷？特登拖多一個禮拜俾班老師交流成績呀？

呢句野我梗係冇講出口啦。

但係，兩位同學全級頭五？

其中一個應該係我啦，但係淨低果一個係邊個？

唔通係曉琳？唔會呱？

咁我真係有機會輸喎......

話就話無限挑戰啫，但係輸佐會打擊自信心㗎......

我要對自己抱有信心，我一定可以赢到曉琳㗎！