森林裏面遇見你: 七
星期一返到寫字樓嘅時候，我發現襯色姐張枱上面嗰啲閃令令嘅文具竟然唔見晒，只係剩低一片呆滯嘅灰白色。
人事組嘅文員話襯色姐已經離職，我地都愕晒然。上個禮拜佢仲如常返工，完全冇跡象。
我地追問襯色姐離職嘅原因，佢話人事組入面只有行政主任或者更高級嘅人知道原因，但佢地都好口密。
同事們竊竊私語。
「聽講佢同玲玲姐嗌大交，嬲到抌低一個月糧走。」
「唔係呀嘛！為咗啖氣唔見幾皮嘢？」
「聽講佢係一個有錢佬嘅私生女，正一係賺錢買花載！」
「唔係喎，我聽講佢係一個有錢佬嘅情婦喎。」
「可能佢係一個有錢佬嘅私生女，又係另一個有錢佬嘅情婦呢！」
「咁更加唔使做啦！」
襯色姐突然消失呢件事令我好困擾，成日都冇心機做嘢。我呆呆望住百頁簾上面嗰個蜻蜓萬字夾，發現隻蜻蜓好似我咁呆咗喺度，郁都唔郁。
我諗起一件事。幾個星期前有人嚟洗冷氣機，之後襯色姐就話啲冷氣吹住佢個頭，於是用咭紙封咗個風口。
我推張椅去風口下面，企上椅度，將風口上面嘅咭紙搣落嚟。
蜻蜓又再拍翼。
夜晚我如常喺屋企同Vivian一齊食飯，食完飯之後就如常入廚房洗碗。我喺洗碗呢件事情上好有心得，能夠用最短時間、最少水同洗潔精洗到啲碗碟最乾淨。我一度認為自己係世上洗碗洗得最好嘅人，直至某一日，Vivian捧起啲碗碟仔細檢查，然後話我抹得唔夠乾。
為咗繼續認為自己係世上洗碗洗得最好嘅人，而家我每次抹晒啲碗碟之後都會扭乾條毛巾，再抹一次，檢查過冇晒水氣先放入碗櫃。
洗完碗出去，我見到Vivian講緊電話，神色凝重。收線之後我問發生咩事，佢話婆婆入咗醫院。老人院嘅職員話佢去廁所嗰時跌倒，暈咗，而家已經晒返，但神智仲係有啲混亂。
我打算同Vivian一齊探婆婆。
婆婆入咗伊利沙伯醫院，探病時間下晝五點開始。Vivian請咗半日假，返屋企煲粥然後去老人院幫婆婆攞啲衫同日用品去醫院。我就準時收工然後直接搭車去。
上到病房，我見到婆婆挨喺床頭升高咗嘅病床上面，而Vivian就用消毒紙巾抹緊個床頭櫃。床尾嗰張高枱上面有個暧壺，旁邊有碗粥，食剩細半。
我走去床邊同婆婆打招呼，婆婆慢慢將眼珠轉向我，但面上其餘位置就保持僵硬。
我曾經同Vivian去老人院探婆婆。眼前嘅婆婆比我記憶中嘅縮細咗，而面上嘅皮膚就好似因為身體縮細咗而變得更皺。
「婆婆而家咩情況？」我問Vivian。
「見唔到醫生呀，問過姑娘，話佢血壓高、腦出血，畀咗藥佢食，要繼續觀察。」
Vivian抹完嘢之後就將帶嚟嘅衫放入床頭櫃，然後將水杯、水壼、面紙、牙刷等等整齊咁擺喺櫃上面。
我見到婆婆嘗試擘大口，但嘴唇好似俾漿糊黐住咁，花咗好大氣力先擘得開。一個短促嘅聲音從正張開嘅口發出，似呼叫，又似呻吟，但感覺上呢個聲音唔係因為痛或者任何原因而發出，只係好似打開一道好耐冇開嘅門嗰陣，門鉸發出嗰種無意義又令人不安嘅聲音。
「做咩呀？」Vivian用氹細路嘅語氣問，但婆婆冇答。
「毛巾喺邊呢……明明帶咗嚟……」Vivian自然自語。
佢喺個櫃度摷咗一輪，然後又摷下佢帶嚟嗰啲環保袋，但似乎搵唔到佢要搵嘅嘢。
「俾人偷咗呀。」婆婆話。
婆婆嘅說話好似係回應緊Vivian，但睇佢嗰雙全無焦點嘅眼，又似發緊開口夢。
「點會有人偷毛巾呀？」Vivian同佢講。
「俾人偷咗呀。」婆婆堅持。我上次喺老人院探佢嘅時候，佢都成日話有人偷佢啲嘢。
Vivian將櫃入面嘅衫拎出嚟，逐件揚開，但都見唔到毛巾。
佢摺返啲衫，摺到一半好似突然醒起啲嘢，望一望櫃入面，然後又繼續摺衫，摺摺下，又去摷下啲環保袋。我見到佢啲動作變得急速細碎，繼而失去條理；雙眼開始紅，眼淚喺眼眶邊緣搖搖欲墜。
佢背住婆婆用手指掃走啲眼淚。
我上前攬住佢，喺佢耳邊講：
「放鬆啲，冇事㗎。」
佢呌咗啖大氣。
「不如落去行個圈，順便喺留下便利店買毛巾。」我提議。「我喺度陪住婆婆。」
我拉張凳去婆婆床邊，坐低之後，見到婆婆嘅視線向住病房門口。我話畀佢聽佢個孫女去咗買嘢，好快就返。
病房入面有六張病床，瞓咗五個阿婆同一個中年女人。隔籬床個阿婆一直喺度瞓，冇郁過，亦冇人嚟探。除咗佢之外，其他病人都有一兩個親友圍喺身邊。其中最引人注目嘅係嚟探對面個阿婆嗰一男一女，男嘅著螢光粉紅polo裇，留羊咩鬚；女嘅著紫色連身裙，搽鮮紅色唇膏。從佢地嘅年紀同對話內容可以推斷佢地係阿婆個女同女婿。佢地將啲暧壼、飲品、麵包、生果堆滿枱面同櫃頂，又大大聲咁同阿婆傾偈。個阿婆睇落好精神，講嘢都好有中氣。
我都想同婆婆傾下偈，但一時之間諗唔到講咩。
望見婆婆乾燥嘅嘴唇，我醒起嚟咗咁耐佢都冇飲過水。
「婆婆，飲唔飲水呀？」我問。
「嗯。」
我摸摸床頭櫃上面個膠水壼，確定水溫適中之後，就將水斟落水杯。
我將水杯送到婆婆嘅嘴唇。佢飲咗兩啖，然後合埋個口。
能夠為佢做啲嘢，我好開心。
唔知係咪飲完水之後覺得喉嚨暢順咗，婆婆開始一輪嘴咁講嘢。佢講到停唔到口，可惜我完全唔知佢講緊乜。聽下聽下，我開始懷佢唱緊歌。我隱約聽到「月光光」呢幾個字，雖然聽唔出《月光光》嘅旋律，但以聲音嘅起伏同句子嘅長短嚟推斷，佢好有可能真係唱緊《月光光》。
我記得對上一次聽《月光光》，係喺我最後一次見到Jane嗰晚。Jane係我細個嗰時最鍾意嘅菲傭。嗰晚佢唱完《月光光》我就瞓著咗，再擘大眼嘅時候，我見到一張陌生嘅面孔。阿媽話Jane已經走咗，新嘅菲傭會照顧我。
眼前呢個同我第二次見面嘅婆婆竟然喺腦出血嘅狀態下唱《月光光》畀我聽。我覺得我地之間有一種奇妙嘅感應，好似存在喺身體以外嘅我地喺某個空間接通咗。
我好想Vivian聽到婆婆唱歌，可惜佢上返嚟嘅時候婆婆已經唱完。
Vivian喺洗手盤洗毛巾，然後幫婆婆抹身，冇幾耐之後，探病時間就結束。
我同Vivian去醫院飯堂食飯。我話婆婆唱《月光光》畀我聽，佢覺得好驚訝。