講故．講夢: 特別篇 作家訪問——阿四月
今日我哋好高興請到陳四月同我哋做訪問，我自己本身就一直都有追四月的故，所以構思呢個故事嘅時候諗緊，既然我個故係講一個人係講故台出故嘅故事，不如就訪問下啲作家，了解下佢地嘅背景，令大家見到各個作家嘅另一面。每個訪問之前我都會拜讀嗰位作家嘅作品，以讀者身份去問佢地最想問嘅問題。第一期就好自私地請咗自己鐘意嘅四月上嚟。陳四月，喺今年二月以「下海的新人」名義發佈佢第一篇的作品《輪迴交易現場》，新鮮的設定加上其人物塑造的手法令佢成為年頭最出名嘅作品之一，及後嘅《攻略鄰家七姊妹》同《夢慾願墮》都深受一眾讀者愛戴，短短十個月後嘅今日，《輪》一書正式實體化，我就覺得好興奮同期待喇，咁就事不宜遲我哋立即開始！
伊高：點解會想喺講故台分享故事？
四月：實不相瞞，其實我喺講故台追好幾年故，睇嘅除咗故外，識睇當然睇留言啦。而講故台，正正係講者最願意同作者交流嘅地方，咁作者先知讀者鍾意點嘅角色，點嘅題材，好多對話其實補充咗我交待不足嘅劇情，所以過去其中兩個故事，我會寫人物專訪同大家玩下。
伊高：我知道四月係一個平面設計師，咁平時寫文嘅時間會係點分配？
四月：以前番工嘅地方要一個鐘多d既車程，第一篇文就係番工嘅車程到誕生，然後當然又係收工後啦，兩程車再加多夜晚兩個鐘左右，就會完成一篇啦。放假？當然要放更多時間寫啦，唔係嘅話半年都未必起到一個故。
伊高：我知道《攻略鄰家七姊妹》比《輪迴交易現場》早出世，但點解會突然停咗寫呢？
四月：依個問題問得相當好，我都好樂意解答，《攻略鄰家七姊妹》嘅前半其實係講主角阿琪同七重人格既愛瑪嘅相處，由追求，到交往，係好玩、開心、甜蜜嘅。但個故嘅真正主線，是人格消失，包括阿琪愛上嘅主人格愛瑪，同我特別唔捨得嘅愛琪，要殺死自己鍾意嘅角色，好沈重，所以當時我覺我自己未成熟到足夠處理好咁嘅劇情，七姊妹就放左入雪櫃了。
伊高：對於《輪迴交易現場》嗰陣出街短短三個鐘就得到三哥留言支持，更喺十二月十號正式成書出版有咩感想？或者有冇特別想多謝嘅人？
四月：咁叻既你！三個鐘你都留意到！(伊高按：當初就係見到三哥留名先繼續追看，哈哈) 其實我好多謝三哥，一路無開名講係因為我怕好似沾佢光，亦都怕佢會介意，其實無三哥留意到《輪迴交易現場》，我諗輪迴未必會有出書嘅機會，余兒大大會留意到輪迴，其實都係因為三哥。書其實就印起啦，當然成到實體書係好大鼓勵，鼓勵剛好對寫故無咩信心嘅我，但係⋯⋯見步行步啦，要靠寫故搵食，我未夠班。想多謝嘅除左三哥，余兒同編輯少尾，設計封面嘅nik爺，同睇過《輪迴交易現場》嘅巴打絲打吧，無你地推，點會吸引到更多人入去睇，點會變成實體書吖。
伊高：《夢慾願墮》採用單元式嘅寫法，中途提及好多人性同道理，係咪有特別嘅訊息或者用意比讀者們？
四月：巴打你真係有睇哂小弟三個作品啵，多謝支持。(伊高按：客氣客氣！) 《夢慾願墮》一個又難讀又唔吸引讀者嘅名，藏住嘅係故事嘅主旨，面對夢想與慾望，你願意走向墮落嗎？當中嘅願望，有係我身邊人想要的，我們都有慾望，但能不忘初衷的人少之有少，如果當中有讀者的願望，我希望嘅既人唔會走上相同嘅路。
伊高：你嘅作品會係中途加入角色嘅訪問，呢個特色係你自己提出？
四月：我諗做過類似既事既人我唔會係第一個啦，會加入角色專訪係因為子朗，我估唔到大家會咁鐘意子朗，為子朗留言嘅仲多過三個主角，所以我萌生左用專訪，俾大家更了解角色嘅念頭。
伊高：四月你喺角色塑造方面令人深入民心，到而家都唔少讀者狙擊緊勝男，但如果要喺《輪》《攻》《夢》，你三篇長篇小說當中揀一個最鐘意嘅角色，你會揀邊個？
四月：不敢當...我諗係愛瑪，因為愛瑪既變化其實幾大。悲慘的過去，註定消失的命運，有如虛像的愛情，住在同一身體的情敵，把最好留給愛人。依幾句設定，係開始寫之前愛瑪名字下嘅最早設定，有時我都覺得自己對愛瑪幾差，除左遇到阿琪外，發生係愛瑪身上都無好事。
伊高：今年對你嚟講必定係永遠難忘嘅一年，當中有冇學到啲咩？同埋2017年又會有咩大計？
四月：今年對我係難忘嘅，今年好動蕩，我係今年寫咗三個故，同時轉咗三份工，學到嘅⋯⋯係珍惜時間，原來我而家覺得既一日只有24小時，曾經我浪費過無數咁多，當你嘅家人變老，當我變成叔叔，才發覺原來我已經不是能不付責任的孩子。2017，我想寫三個故，我想做好每一個，就算人氣旺與靜，我想大家覺得我唔係《輪迴交易現場》既陳四月，而係你睇過佢嘅任何一個故都覺得幾好睇嘅陳四月，我想就算2017係我最後嘅一年，我仍然覺得人生不枉過。
伊高：最後回應返我呢篇故事嘅主題，你覺得點先係一個好嘅故事呢？
四月：好嘅故事，我嘅角度講嘅話，無論係正能量定黑暗，無論係甜故定係政治，只要睇完過後，讀者會有自己嘅得著，無論係感動定反思，就係一個好故事。感謝你，因為你既欣賞，我有依個同你造訪問嘅機會，我地都係喜歡故事嘅人，我地需要嘅，同樣係欣賞我地嘅人。
再次感謝四月願意喺百忙之中抽時間同我呢個寂寂無名、初出茅廬嘅寫故事嘅人(本人實在不敢自稱為作家)。陳四月係今年年頭嘅大熱處女作《輪迴交易現場》已經係各大書局有得買。正因為好佢地都係將寫作列為副業，所以更加需要大家的支持。同時敬請大家期待四月嘅下一部作品《妖氣報告（暫名）》。如果大家有其他想了解佢多啲嘅作家，記住留言講低，本人會盡力搵佢哋出嚟同大家見面！