講故．講夢: 十一

「咩故事？」我滿帶疑問，心想或許是內地的小說，或許是電子書，一定不是講故台。
       
「呢個啊，我啱啱搭車嗰陣見到，我覺得好搞笑！」她把手機遞向我，我看過後頓時反應不來。
       
手機上的正是我出門前發表的作品，12個正評、2個負評、30個留言。原來家澧都有上講故台的習慣，兄弟們，真的有絲打……
       
「好搞笑㗎，個主角同隻惡魔嘅互動已經好有趣，你睇吓你睇吓！」小姐，這個故事是我寫的，我只是校對第一章都已經重覆看了五六遍，我可以背誦給你聽啊……心底話當然放在心底，我接過手機，閱讀的不是正文，而是留言。
       
｛留名｝一半以上的留言都是留名；





｛好搞笑，唔好爛尾｝Okay，無問題；

｛多甜唔該｝你想主角跟貝力亞魯……果然重口味；

｛100個靈魂……你唔好拖故就得｝小弟會學懂拿捏。

「唔知主角狩獵第一個靈魂成唔成功呢，個女事主好似係唔會受惡魔引誘嘅人嚟㗎！」

「阿澧，你想知？」我狡猾的笑，那許這是個搏取好感的絕大機會。我從褲袋取出手機，然後打開Google Drive，再遞給家澧。





「痴線！冇可能㗎，你……你就係伊高仙貝？」家澧從懷疑到相信，專心地閱讀故事的第五章。

「我冇存貨㗎喇，你再想睇都冇得睇。」家澧仔細地打量著我，害我「紅都面晒」，晶瑩的眼睛就像黑洞一樣把我的意識吸進去。不，再望我會被石化。

「估唔到你係一個作家！」家澧左手一掌轟落我背部，我後悔鬆懈了自己的中路，咳得喘不過氣。

「係啊我上一秒都仲係作家，但啱啱呢一下畀你拍散我全身經絡，應該命不久矣。」

我們到達旺角後找了某間樓上咖啡室用餐，途中我們都傾得十分開懷，關係好像更進一步。





「高烙然，你每寫新一話就要第一時間畀我睇，知唔知？」

「……畀你睇咩著數都冇，好難令人聽你話喎。」

「你下次想約我唔好再搵阿祖同阿芝過橋，哼！」家澧頭也不回的進入她屋苑的閘門，慢慢消失在我眼珠中。

Oops, 穿崩了。
時間飛快轉動，日曆都撕了兩十多張。香港開始入冬，但天氣偶爾都會升至廿多度，變化比女人更難捉摸。其實女人更加難捉摸。逢星期一至五一日一篇的故事，轉眼已經來到結局篇。主角已經狩獵了99個靈魂，但第100個？我想令故事更加有意思。忘了跟大家講故事的反應，今天故事已經達到三百多正評，負評不足十個，而讀者們已經推爆了幾個Post。處女作得到肯定的確令人心情暢快。

聖誕節一星期前，凱瑞突然說有要事商量，於是我登門造訪。

「咩事啊？關你個澳門線上賭場故事？你條友到底睇左幾多集《賭博默示錄》同《噬謊者》，入面啲賭博心理學用得咁癲嘅？」凱瑞的《澳門首家線上賭場上線啦》人氣可謂驚人，平均三日就1001一個Post，我根本望塵莫及。

「唔係啊，今次討論嘅……係你！」凱瑞托一托眼鏡，左手插在褲袋，右手指向我。《名偵探柯南》？
我？我不是兇手啊！難道……