[旅行鬼故事系列] [陳生返黎啦] 澳門旅遊之陰魂不散的傳教士: 彩蛋二：天賜與阿詩 - 分手物語 (中)
「阿詩，我……」我倆的唇分開了後，我深情的對著她，想把自己的想法告訴她！
「天賜……多謝你……多謝你呢幾年嚟，對我所造嘅一切！我好開心！我真係好開心！」阿詩又哭了起來！
「傻嘅咩？做咩又喊呀？無事架！無事架！我應承你，我會同你一齊！我好快會返嚟同你一齊！」我再次抱著她，卻再次被她輕輕的推開！
「我明！我明架！但係……我……我真係驚！我唔驚你會變！我……我驚自己會變！你去美國讀書，我地一年可能只會見到一次面，甚至更少！我……我唔知自己係咪可以等到你返嚟！亦唔知自己會唔會好似今次咁，情緒變得激動，到時影響到你，又影響到我！我……我唔想咁！」阿詩說著，眼淚又流下來了。
「阿……阿詩，咁……咁即係咩意思？我……我唔明！」我不解的問。
「嘻嘻！估唔到聰明嘅天賜都有唔明嘅時候！」阿詩悲傷的笑了一笑，然後深深吸了口氣。
「我想講，不如我地……我地……我地……嗚嗚……」阿詩本以為深呼吸了一口氣後，便能夠把話說出來。
但.…..這豈是能如此輕易說出來的話！
此刻，即使對感情如此蠢鈍的我，也猜到她想說的是甚麼！
阿詩強忍淚水，想再次把話說出來！
我可不會給她這樣的機會，我把唇靠近她，深情的親了她一下！
「阿詩，唔好講！既然會令你咁傷心嘅，就唔好講出嚟！而且......我唔會接受！我唔會放棄你！」我緊抱著她不放！
「天賜......我......我都唔想架，不過，與其讓花慢慢淍謝，不如喺最靚嘅時候，將佢造成標本！咁樣，至少我地可以保留最美好嘅回憶！」文學少女般的情懷，讓阿詩變得憂鬱起來！
「阿詩，唔係咁架！唔應該係咁架！點解......點解唔可以俾花一直燦爛落去？我相信我地可以，可以永遠都咁好架！阿詩！」我也忍不住流出了眼淚，我從不知道，原來阿詩對我如此重要，失去她將會令我生命失去色彩，變得暗淡！
「天賜！我......我都唔知道！但我無信心，我真係無信心！我唔覺得你會喺果邊識第二個，我都唔覺得自己會喺你留學期間投入新嘅感情！不過......不過......我就係無信心！我覺得，就算我地兩個都無新嘅戀情，幾年後喺返埋一齊，都唔會再好似依家咁，有呢種感覺！所以......所以我地都係分手啦！」阿詩輕輕推開了我，她......還是把話說出口了！
這句說話的威力，甚至比父親的咒術或任何妖邪的衝擊來得強烈！
我真的完全反應不過來，我呆了！
「嘻嘻！你做咩呆咗呀？放心啦，就算我地分咗手！我，鄭美詩都會同張天賜係一世嘅好朋友嚟！只有咁樣，我先可以全心咁支持你去外國讀書，追尋你嘅夢想！我......會一直支持你！我......會祝你幸福！我......」阿詩說到最後，還是忍不住落下淚來！
「再見啦天賜！我......我愛你！」阿詩輕輕親上我的嘴唇，然後急步的離開了，我隱約聽到她離開時的哭聲！
我不知道自己究竟呆了多久，夕陽也完全消失，黑夜完全覆蓋了整個公園，也覆蓋了我的心靈！
「奇怪？頭先發生咗咩事？我喊緊？點解嘅？我係邊個？我做緊咩？」我淚流不止的站在塔頂，我的心很痛，誰可以來幫我啊！
「後生仔，唔好意思呀，呢度夠鐘閂門啦！麻煩你離開！」一名管理員要求我離開，我......果然很礙事吧？
「對唔住，我......我依家走！」我不知道我當時的表情是甚麼模樣，但那管理員明顯的嚇了一跳，我......果然很嚇人吧！
我在街上漫無目的走著，別人經過時，都向我投以奇怪的目光！
算了，不管了，反正我甚麼也不是！
而從剛剛開始，我的電話已在響個不停，是誰啊？我不想接聽啊！
我在一張長椅上坐下來，電話仍然繼續響著，是阿詩嗎？不會的，不會的，我......跟她已沒有關係了！
然後，一位老人家突然對我說：「後生仔，你電話響咗好耐啦！唔好要人擔心啦，聽一聽電話，等人安心啦！」
我......又做錯了嗎？
「呀，好，唔該你！」我向老人道謝了後，終於接聽了電話！
「喂！死仔你喺邊呀？唔係去咗自殺呀？你同阿詩搞咩呀？佢無啦啦SMS叫我睇住你，又話擔心你有事！我問佢做咩唔自己搵你佢又唔答！你兩個搞咩呀？」一連串的問題從電話傳來，是子鋒！
「子鋒......我......我......我同阿詩散咗啦！嗚......嗚......」我終於忍不住，對著電話大哭，阿詩！阿詩！
「散咗？搞咩呀你地？咪啦，你依家喺邊？」子鋒著急地問。
「我唔知，我唔知行咗去邊，我......我好辛苦......子鋒......我好辛苦！」我感到自己的心在淌血！
「呢度係元州仔公園呀後生仔！」剛剛的老人忍不住搭話！
「元州仔公園！得，你唔好郁，我依家過嚟！你等我半個鐘！呀，唔係，十五分鐘！你唔好走開！我即到！」子鋒那邊傳來開門的聲音！
「你過嚟？你過嚟又點？我同佢散咗啦！我應該點做呀子鋒！我......我已經唔知點啦！我好無用！我好無用呀！」天賜嚎哭著。
「後生仔你快D過嚟！唔駛擔心，我會睇住佢先架啦！」老人又忍不住大喊！
「有人喺你身邊？唔理啦，總之等我十五分鐘，你一步都唔好郁！」子鋒把電話掛斷了！
我放下了電話，頭伏在自己雙臂上痛哭，回憶著跟阿詩的一點一滴！
但我發現，很多我跟阿詩之間發生的情況，有很多都已變得很模糊，難怪阿詩會離開我，我真的是一個廢人！
每回憶起一段畫面，我的心就像被刀割了一下！
「天賜！你喺邊呀？」突然，我聽到子鋒的聲音，不會的，我這廢人怎會有人在意！
「後生仔！呢邊呀！」老人突然大叫。
「呢邊？呀！頂你，打你電話又飛去留言！我爭少少報警架啦！老人家，唔該晒你啦！」子鋒急步跑過來，我才發現自己的電話原來沒有電源了！
「唔駛客氣，咁我走先啦！你安慰下你朋友啦！」老人家向子鋒交待了聲，便離開了！
我感到子鋒在我的旁邊坐下來了，但我真的不想再麻煩別人了，像我這樣的廢人沒有資格得到別人的關心！
我感到子鋒站了起來，然後緩緩的走開了！
看吧，我就說我不值得別人關心，連子鋒也放棄我了！
「張天賜你同我起身！」我忽然聽到急速的腳步聲向我走來，我也不曉得是甚麼原因，我真的如子鋒所言，站了起來看著他。
但我卻看不見他的身影，因為，我只看見了一個斗大的拳頭，在我面前出現！
我被這拳打得倒在地上！
「好......好......好痛呀！搞咩呀你！」我按著臉頰，很快的站了起來，怒視著子鋒！
「好！痛就好！總算出咗啖氣！」子鋒擦了擦拳頭，笑著對我說！
「痴線架你！出咩氣呀？我又無得罪你！鼻血都流埋啦！」痛楚加上怒火，把剛剛的失落感一掃而空！
「你梗係無得罪我啦！你得罪咗我女神Ja嘛！」子鋒嘻皮笑臉的說。
「咩女神呀！都唔知你講咩！」我按著臉頰對他說。
「阿詩呀！佢不嬲都係觀中嘅女神架啦！我係代替全間學校嘅男生教訓你，替月行道，儆惡懲奸！」子鋒擺出美少女戰士的招牌動作，我忍不住笑了出來！
「點呀你！好核突好樣衰囉！」我忍不住說。
「唓！有幾樣衰！邊樣衰得過你先得架！」子鋒指著我。
「我......我......唉！我同阿詩......」我又開始傷感起來，卻突然感到一陣拳風向我襲來，我側頭躲過了！
「總算正常返D，避到我嘅拳頭啦！我唔理你咩事都好，依家咁樣死下死下係解決唔到問題！同埋咁嘅死樣一D都唔襯你！嚟啦，講俾哥哥知發生咩事，有無得救都好，講出嚟點都舒服D！」子鋒搭著我的肩膊說！
然後我把一直以來和阿詩的問題，向子鋒傾訴，之後亦把今天的事告訴了子鋒！
只見子鋒低頭不語，我實在忍不住了！
「點呀？究竟有無得救呀？」
「痴線！我點知有無得救！我啱啱先拍拖，你唔係諗住我幫到你呀！」子鋒嘻皮笑臉的說。
「呀，你條仆......」我正想破口大罵，子鋒卻打斷了我的說話。
「咁你又唔駛鬧我住！我唔知點幫你者，但你肯定知點做！」子鋒略帶深意地說。
「我？唉，如果我知就唔會搞成咁啦！」我又陷入了傷感之中！
「夠啦！成隻死狗咁係無用架！我淨係問你一句，你鍾唔鍾意阿詩？」子鋒問我，我堅定地點了點頭！
「咁咪得囉！講真，追女唯一條件就係面皮夠厚！何況本身阿詩都鍾意你，仲邊有得輸架！同埋，你試都未試去追返佢就死狗咁款！我係你就一定死唔眼閉！」子鋒認真地說。
「追返佢？」我真的從沒有想過！
「正確嚟講，都唔算追返佢，而係箍煲！箍煲係仲有留戀，追返係無咗感覺！好明顯你好有優勢！而且女仔嘅嘢，最重視回憶！你勾起返同佢嘅回憶，就肯肯定搞得掂！」子鋒一副戀愛大師的模樣，教我不得不信服！
「回憶？真係得？」確實，剛才如果我可以回答得出第一次收禮物的情況，可能也不會弄至如斯地步！
「唔係得唔得嘅問題！而係你做唔做嘅問題！做就有機會，唔做就一定無機會！你做定唔做！」子鋒指著我。
「做！我一定做！唔理咩都好，我一定要做！但......頭先你嚟果陣，我發現真係有好多嘢唔記得咗，咁......」我不知所措地說。
「唔好咁啦！搵又好摷又好問人又好點都好！你一定要諗辨法，唔係嘅話，過咗黃金七十二小時就無架啦！」
「好！你講得啱，我......我要試！但係......咩係黃金七十二小時，唔係救災用嘅咩？」我不解地問。
「咩者，咁分手都係災難者！算啦，其實係我鳩Up！」子鋒認真地說，我也襯機還他一拳！
「但係，我驚阿詩到時唔理我......」阿詩絕情起來，可不是說笑的。
「得啦！你唔駛擔心，總之到時我有方法幫你約佢出嚟！就算你要約佢喺北極，我都會幫你約到佢！放心啦！」子鋒自信地說，好吧，這個時間我也只能相信他了！
接下來的廿四小時，我可說是不眠不休的把所有回憶給挖出來了！
我才發現，自己是有多忽略阿詩了！
一直以來，都是她在體諒我！
我，真是一個不稱職的男友！
但我總算記起，第一次收到阿詩的禮物時，究竟我說了些甚麼！
亦終於想起，那對鑰匙扣的真正意義了！
然後，我趕緊的買了一對鎖頭，把它刻上了我和阿詩的名字後，便告訴子鋒：「子鋒，麻煩你幫我約阿詩再去一次大埔回歸塔！喺邊度跌低，我就要喺邊度起返身！」
「哇，咁有難度？再約同一個地方，佢實知係你啦！」
「吓，者係唔得呀？」我可是把所有東西都準備好了，該不會......
「我話有難度者，無話唔得！包在我身上啦！」
交給你了子鋒！