[旅行鬼故事系列] [陳生返黎啦] 澳門旅遊之陰魂不散的傳教士: 彩蛋一：天命叔與拉斐爾（上）
時間：1980年
地點：東龍洲
「臨兵鬥者皆陣列在前！九字護身法，受死啦！」我是張天命，此刻的我，正在東龍洲跟其它師兄弟一起修練道術！
「叫咗你幾次唔好亂用咒術！靈力乾涸嘅時候你就知死！」黃立仁師兄狠狠的在我頭上敲了一下，教訓我別要亂用咒術！
「咩者，呢度咁多師兄弟，唔怕啦！」我按著頭頂上腫起來的小包說。
「唔怕你個頭！你知唔知東龍洲呢度陰氣好重，平時唔會有人嚟呢度，所以會有好多唔同嘅非人生物嚟呢度修練！你亂用強大法術，陣間打攪到其他『人』，我唔會救你架！」立仁師兄怒道。
「非人生物？師兄呀，其實之前師傅都有講過果D咩非人生物，其實究竟係咩嚟？乜呢個世界唔係得鬼嘅咩？」當初我拜入師傅門下，除了因為命運外，還因為家人被鬼騷擾得太過厲害，所以我才立志學道，但……原來道術並不只用來對付鬼魂！
「本來呢個階段唔駛講你知嘅，不過你比起其他同期嘅師弟都要出眾，我姑且同你講下啦！基本上我地門派，修練有成之後，通常都會替一般市民去驅除妖邪同鬼魂！但鬼魂其實只係其中一類嘅非人生物，其它對人有害嘅，例如貓妖、蛇精、殭屍、魔鬼等等！」
「魔鬼？呢D唔係西洋嘢咩？咁唔通又有天使？」我被立仁師兄賞了一下老拳！
「聽你就聽啦！無錯，的確係有天使！仲有神、狐仙、精靈等等嘅非人生物！」
「吓？唔撚係卦？」我張大嘴巴，感到不可思議。
「有幾奇者？大部份果D生物都係人俾咗個名佢者！神係咪真係全能，魔鬼係咪真係住喺地獄，呢D我地都好難證實！不過，有一個共通點，就係我地修練得嚟嘅力量，一樣對佢地有效！可能用嘅方法，用嘅能量會唔同，但只要夠強大，師傅講過，連神同撒旦都唔係佢對手！」立仁師兄愈說愈激動，仿佛真的遇神殺神、遇佛殺佛似的！
「痴線！師兄你俾師父洗腦Ja？吹到咁大，我就真係唔信啦！」結果頭頂又捱了師兄一下重拳！
「你再亂講嘢我就打到洗你腦為止！同埋，我先無吹水，我真係見過師傅同天使聯手對付魔鬼！」立仁師兄進入回憶模式，我則仍然保持著「唔撚係卦」的樣子看著他。
「痴線，要我信有呢啲神呀魔呀，我寧願信男人唔咸濕啦！」
「你見識少唔信都好正常！不過我可以同你講，如果你想一直都唔信有我講嘅生物，你就唔好亂咁走！東龍洲呢度真係各種生物都有自己地盤，搞到佢地嘅話我地就有排煩！」
「超！我都唔明，你講到呢度咁危險，又唔可以練D大咒術，咁我地嚟呢度做咩者？」
「練咩？就係練你地收放自如嘅能力！呢度除咗俾其他生物割據之外，仲有大量遊魂係度！你要練習淨化用嘅咒語，同埋練習控制力量嘅強弱同埋方向！呢度有無數咁多不同嘅磁場，你練下就知係有價值嘅！」
「唓！練咪練囉！用咩好呢，就五雷咒啦！受死啦，五雷……」在結印期間，立仁師兄又賞了我一記老拳，痛得施咒失敗了！
「你係咪無耳性到咁呀！我係話淨化！係淨化呀！唔係叫你打散佢地！唔好以為自己力量大就可以亂咁打散人地！因果報應呀！淨化怨念係做功德，打散係作緊孽！用淨靈咒！記住，用適當力量去淨化就得啦，唔好搞到其他人無得練習呀！」立仁師兄說教完畢後，便去指導其他人了！
「超！咁鬼煩架！淨靈咒一早練熟啦，有咩好玩！咦……唔係喎，試下練習連技都好喎！」我意念一轉，便偷偷遠離他們進行練習！
道教的咒術種類繁多，大體上我把它分成了三類！
第一就是輔助類，用作增強或削弱力量，甚或保護心神等等的類別！
第二就是攻擊類，用作打散邪靈而用！
第三就是淨化類，淨化靈魂而用！
所以我一直在構想，能否把這些咒術組合成一連串的技能，讓對付邪靈時更加輕鬆！
東龍洲正好是我實驗的舞台！
我設想的連技是：先用定身咒鎖定目標，然後利用結界把對方力量削弱，最後便用攻擊或淨化咒術把它收拾！
這之中最困難的，便是手印的變化必需要有一定的速度，而且組合起來時有機會出現錯誤的手印，那麼整個連技便會被破壞了！
「哇！正，呢個有十幾隻，等我逐個練習先！定身咒……」反覆試驗了數次，但每次也在結界那裏失敗了！
「定身咒加淨靈咒明明好易做到架！點解加多樣就咁鬼難……如果中間唔用結界，用返同定身咒差唔多嘅咒印會點呢？」我沉思著連技的可能性，最後，我決定用定身咒、五雷咒和淨靈咒這個組合！
因為我堅信，當靈體受了傷後，反抗淨化的能力便會降低！
但……結果證明我錯了！
「就你啦！試下我新嘅連技，定身咒、五雷咒！好！淨靈……」我正想嘗試新的連技，眼前的景象把我嚇得停了下來！
由於連技仍在實驗階段，所以中間的力量控制得不是太好，剛剛的五雷咒雖然成功打傷了眼前的靈體，但卻不小心把四周的非人生物牽扯進來！
「係邊個夠膽用雷打我？」原本空無一物的草地上，突然出現了一頭會說話的狼，牠按著右臂，憤怒的咆哮著。
「唔撚係呀？狼人？」我嚇得呆了，淨靈咒的手印解除了，剛剛被我困著的靈體襯著這空檔逃走了！
「細路你係咩人？點解要踩入我地地盤！」在狼人身旁，出現了一位老人，但這老人的耳朵長而尖，跟一般民間描寫的精靈頗為相似！
而且在他身旁，有一些跟手掌那麼大的發光物體圍繞著老人在轉！
「咪玩啦！連精靈都有！」我嚇得合不攏嘴！
因為在這兩個生物的四周，陸陸續續出現不同的物種，像百鬼夜行一樣！
我被這些非人生物團團圍住，動彈不得！
而剛剛的老人，感覺在這群生物中也是比較高級的存在，他對著我說：「細路！好講啦！你嚟呢度做咩？」
「我我我我嚟呢度練下道術Ja！我唔知會搞到你地架！」放眼過去，他們少說也有二三十人，我再天才也應該應付不了，還是先裝無辜吧！
「你唔扮嘢啦！你其他師兄弟都喺草原嘅另一邊，得你一個過嚟！肯定係想挑戰我地，我就成全你做你第一個對手！」剛才被我傷了右臂的狼人，走了出來，一副想要把我生吞活剝的樣子！
「冷靜D，如果佢無惡意，我地都唔好為難佢！」那老人帶有威嚴地說！
「講得好！好波！就咁放過我啦！」我心裏大喜。
「哼！咁你話點做好啦？佢傷咗我，我地廿幾個種族都俾佢搞到，我點都唔會就咁放佢走！」狼人雖然也聽那老人的說話，但他竟把全部人都拉下水，這下我是凶多吉少了！
「你都講得啱嘅！咁啦，就咁走就無可能架啦！細路，我被兩個選擇你！」老人權衡輕重後，還是要我承受惡果來得划算！
「吓？咁……咁……」我可不認為那些選擇會好到哪裏！
這些奇怪生物閉上眼睛，大慨是在商量著如何懲罰我吧！
我本想襯這機會逃跑，可惜四周也被他們阻擋著！
「好！細路唔錯呀，無襯呢段時間逃走！」要不是你們全方位包圍，我早就逃跑了，媽的！
「我地頭先商量好啦！見你唔係有意打搞我地，我地都唔想造成咩混亂！你揀啦！你想留低自己四肢，消除記憶咁離開呢度？定係想完完整整咁，作為呢位狼人嘅隨從，跟佢走？」那老人嚴肅的說，媽的，我早猜到你們不會給我甚麼好的選項了！
「我……我……兩邊都唔揀呀！縛神咒！」在他們討論期間，我早已結好手印！
但一次過使接近三十個的靈體同時受到束縛，我感到自己的靈力好像一下子被抽乾了！
「細路！你以為困得住我地咩，呢種鎖我三秒就破解到啦！」狼人對我怒吼，但有三秒已經足夠了！
我襯著這個空檔，跑到草原旁邊是一個樹林，我馬上跑進樹林，在逃進樹林後馬上在進來的地方設立了一個簡單的結界，以防他們進上來！
在我拔足狂奔之際，我隱約聽到那狼人在咆吼，那聲音仿佛下一秒便能追上來！
我不敢回頭，繼續奔跑，卻意外地摔了一跤，跌在地上！
我本想撐起身來，繼續逃跑！
卻在施力起來的時候，發現地上的感覺有點奇怪，下一秒，我已掉進一個很深的洞穴裏，暈死過去！