《廿一歲個年，我成為左隱世富豪》－大結局: 第二十二章：聖誕之夜（一）
係間舖頭行左一圈，都無咩頭緒，唯有上高登睇下有咩好推介，唉，都估到伏味濃，咩通粉串埋一條做Pandxra，又話咩Panxdol。
都係問個女仔好啲。
「阿妹，女仔鍾意收到咩禮物？」我索性打比佢，夠爽快。
「睇下個女仔注唔注重物質架啫，好似我咁，平平地求其一條靚既頸鏈都可以哄得我好開心架啦，唔講住啦，係街，Bye。」
頸鏈？都好似唔錯喎。
「唔該，我想睇下呢條。」
「係咪買比女朋友呢？」個女售貨員笑笑口對住我講。
「唔係，不過係買比女仔。」
「即係追人啦。」點解啲售貨員可以咁煩，推銷就推銷啦，我私人生活關你咩事。
「你鍾意點講都好，你快啲介紹條靚既比我。」
「而家啲男仔真係心急。」
「嗱，呢條啦，呢條係我地公司今年限量推出架，全球得三百條，而且上面可以馬上幫你刻名。」我唔理佢刻唔刻名，只係覺得呢條都唔錯，都幾啱藍心戴。
「幾錢？」
「三千二百六十蚊。」
「我要一條，唔使刻字啦。」
「唔係喎，刻字都只係十分鐘，而且只要三百蚊附加費。」
「得啦，刻啦刻啦。」望住佢都覺得好煩。
出左去條街到，望住啲小朋友，帶住鹿角，著住套聖誕老人衫，真係得意，不過可惜，我無諗住生仔。
係條街遊蕩左一陣，係小販檔到買左個雞蛋仔食，行返去，應該都差唔多。
「先生，返黎得真係合時，熱辣辣送到。」
我將頸鏈攞起黎睇，印左「Venus」既字樣，的確係幾靚，我果然夠眼光。
「有咩問題都可以攞返黎退換架。」
「得啦，就算有都唔會攞返黎。」因為我唔想再見到呢個人。
收埋頸鏈，離見藍心仲有一段時間，問下佢而家做緊咩先。
「做緊咩？」
「無啊，幫你處理緊淺水灣個到啲野。」係喎，琴晚佢地好似有人搞我地，唔知而家點呢？
「唉呀，你而家係邊？」
「無啊，係淺水灣囉。」睇黎係我地贏左。
「你快啲收工啦。」
「做咩？都未走得。」
「你唔係諗住又自己搞掂啲野下話？我唔會比你咁做架。」
「總之你收工啦，係咪唔聽我講野？」
「哼，攞個上司職位黎嚇我，好囉。」
「乖，今晚獎你啲野。」
「真係？」
「呃你做乜。」
「好，咁我走架啦，唔好比我發現你自己黎淺水灣。」
「得啦。」
你估我真係會聽藍心講野？我揸車去到淺水灣廢車場，見到仲有啲血跡係門口。
「副總。」
「你地無事阿嘛？」
「無，我地已經將佢地殲滅晒。」
「知唔知道佢地係咩人？」
「係千雨既殺手。」人請殺手，你請殺手，請啲垃圾返黎。
「得啦，你地走啦，我換左批殺手幫你地汁手尾，你地去幫我睇住白陸得架啦。」
「知道。」
的確，所有血跡都係千雨班殺手所流，我地只係用左紅外線系統就已經殺晒佢地。
「既然無咩，我都走啦。」
「知道，副總。」
「唔好話比人知我黎過。」我同基地既高級殺手講。
「知道。」
掉左張十億既支票係枱，就轉身離開，就當係比佢地既聖誕禮物。
「我食完野都唔知有咩做好。」藍心再打電話比我。
「做咩咁夜先食野？」
「頭先係淺水灣阿嘛，邊得閒食野。」
「你而家係邊，我黎揾你啦。」
「好啊，我係銅鑼灣。」
今日的確比較凍，我無開到開蓬，亦攞左藍心送比我既個條頸巾出黎戴。
「喂？」
「做咩又打比我？」
「問下你去到邊啫。」
「我...我係天水圍過黎，無咁快啊。」求其作左個大話呃佢，希望佢唔會發覺。
「天水圍？你去天水圍做咩？」
「無啊，個親戚啱啱生左個仔，咪過去睇下，順便送份聖誕禮物比佢囉。」
「呵，真係好笑啦，你幾時有個親戚生仔呢？」大獲，唔記得左藍心係唯一一個知道我以前既野既人添...
「唔該你下次作個大話都作得好啲。」
「講，係咪去左淺水灣？」
「入隧道啊，收得唔係幾好，我等陣再打比你啦。」
「你唔講，我今日唔見你。」
「唉...係啦，我係去左淺水灣，但係我去左五分鐘就返黎啦。」點解，點解我會咁怕藍心？又會咁聽佢話既？
「叫左你唔準去架啦。」
「無下次。」
「收線。」
「喂？...喂？」
呢個藍心真係收我線架喎，係咪唔當我係佢上司。
「喂？我去到銅鑼灣啦，你係邊？」
隔左幾秒，無人講野，但係聽到嘈雜既聲音，睇黎藍心有意玩野。
「再唔講野就收線架啦。」
「我係希慎，Bye。」
哇，使唔使咁快就收線。
黎到希慎門口，咁大個商場，我點揾你，玩捉迷藏咩。
「我係誠品，上黎啦。」藍心都無去到咁盡，send左個信息比我。
「喂，我係到。」我眼大睇過龍，原來藍心就係我隔黎。
「著得好靚喎。」今日佢著左件白色恤衫，襯藍白色漸變圓領冷衫，白色頸巾，加條白色長褲同白色鞋，好似係聖誕裡面顯得更加光亮。
「哇，你成身白色，落雪黎啊？」
「好笑咩。」藍心講完一拳打落我手臂到，不過每一次佢打我都無用力。
「你都唔差啊，幾襯我添。」其實我今日都著左恤衫加圓領冷心，而且色都幾相似。
「哈，你襯得起我先啱。」藍心即刻睥一睥我。
「講笑啫。」
「係喎，你話有野送比我，咩黎架？」我即刻望一望藍心條頸，好彩，佢無戴頸鏈。
「咁快？夜啲先。」
「好囉，懶神秘。」
「不過我都有野送比你。」
「真係？唔係又送頸巾下話？」
「你咩意思啊，嫌棄咁話？」藍心即刻搶住我戴緊既頸巾，好彩我夠大力，先攞得開佢對手。
「我差啲比你勒死。」
「勒死咪好囉，咁唔鍾意我送比你啲野。」
「我唔鍾意，就唔會成日都戴住啦。」
靜左幾秒，藍心望住另一邊，好似唔敢望住我咁。
「係呢，你鍾意睇書架？」
「梗係啦，唔睇書點識咁多野。」
「你有無書想買，我送比你。」
「有，你話架。」
我地係誠品個三層行左兩三個鐘，我地又一齊行，又分開行，我自己都睇中左本書，本書好似係講統治地球既條件，係一班集齊各個時期，皇帝，總統，佢地既統治國家之道，套用係現代世界。
「睇黎你對支配世界都好心急。」藍心突然行過黎，我仲整跌左本書。
「咁，都要做準備。」
「咁又係既。」
「肚餓啊，食野啦。」
「去邊到食？周圍都無位架喎。」望下個錶，只係六點半，所有餐廳已經排晒隊。好彩我早有預備。
「跟我黎啦。」
我地去灣仔，再慢慢行過去餐廳。
「哇，間餐廳好特別喎。」的確係好特別，簡單描述，就係將大排檔搬左入一間舖頭到，可能你會話，大排檔既風味咪無左囉，不過我既身份，去大排檔，應該會比人捉返去。
「我地係咪打邊爐？」
「係啊。」
「誠翔，好耐無見！」
「蛇王，好耐無見！」蛇王係我轉生後識既朋友。
「今日好多客，招呼唔黎，你同你女朋友自便啦。」
「女朋友？」藍心即刻講道。
「咩啫。好難為你？」
「我...」
「講笑咋，你點會係我女朋友呢？」我即刻搭住藍心膊頭，扮下野，點知又食左佢一拳。
「女仔咁暴力無人鍾意架。」
「唔係你鍾意咪得囉。」
「真係多聲氣，叫野食啦。」
舖頭雖然好細，但係氣氛唔錯，亦都吵吵鬧鬧，坐係一旁既我地，見到一家四口，一班朋友，情侶都好，佢地都享受緊同互相一齊既歡樂時光，我相信，我同藍心都係。
「呼，正啊。」我地食到成枱都係野，估唔到藍心食量都幾巨大。
「點解你食極都唔肥既？」
「哈，我有健身架嘛。」
「唔怪得啦。」
「你都係啦，成日食垃圾食物，飲酒都唔肥。」
「我成日周圍走，又要係屋企游水同訓練。」
「訓練？」
「哦，我有個軍人幫我訓練體格，如果你有興趣，可以一齊架。」
「唔使啦，不過無咩見到佢既？」
「呢排咁忙，咪叫佢返美國先囉。」
「哇，美國軍人咁犀利？」
「所以我先咁大隻咋嘛。」我立即做個大隻佬既姿勢比佢睇，搞到藍心苦笑不得。
「唔該，要多兩支藍妹。」
「收到！」
「你都幾飲得架喎。」枱上面已經有十支啤酒，仲未數地下個幾支。
「哈，跟得你多，成日要應酬阿嘛。」
「咁又係，我地飲慣紅酒。」
「黎，兩支冰凍藍妹。」
「我地都食左成三個鐘啦喎。」其實吹水同飲酒為多。
「不如，我地攞啲酒去海旁飲？」藍心提議。
「好啊，不過你唔怕凍咩？」
「唔怕。」
「咁好啦。」
「蛇王，幫我攞膠袋裝走一打藍妹。」
「得，無問題，呢打我送你。」
「真係夠老友。」
我地放低左張支票就走左，雖然有啲誇張，但係對於一個自創業既後生仔黎講，最重要都係資金，而唔係政府既垃圾政策。
我地慢慢行過去銅鑼灣海旁，估唔到今晚無咩人，唔知係咪太凍，返左屋企同另一半取暖。
「係呢，今晚，多謝你。」
「我發覺你都傻傻地架喎，成日無端端講多謝。」
「咁，咁我有禮貌阿嘛。」
「哈，真係乖。」我摸摸藍心個頭，原來藍心既頭髮都好順滑，幾乎一條開叉既毛髮都無。
「變態佬。」
我地係碼頭邊坐低，放低啤酒，果然係好凍，口中甚至噴出冷煙。
「你凍唔凍？」
「少少啦。」
「嗱。」
我將自己既頸巾除低，幫藍心戴上，最重要既係，我偷偷咁順手將頸鏈幫佢戴上，希望佢鍾意。
「咦？咩黎架，咁凍既？」藍心摸摸佢條頸，發現左我送比佢既禮物。
「多謝你喎，條頸鏈好靚，我好鍾意。」
「鍾意就好。」大家都望住個海講野，都好似有啲怕羞。
（中午十二點發放第二十三章。）