《廿一歲個年，我成為左隱世富豪》－大結局: 第一章：隱世富豪？

點算好呢？今日無左Joyce呢個朋友，而且仲未偷到五百蚊...

一直垂頭喪氣咁行返屋企，不過，皇天不負有心人，係我眼前就係一個大好良機去偷錢。

係一個工地隔黎，欄杆上有個工人挨住，銀包亦不覺咁露左半個出黎。

係我心裡面期盼既就只有五百蚊。











我一個閃電手，就輕快咁偷左佢銀包，正當我心裡面慶祝緊既時候，有一隻佈滿塵埃既男人手搭係我膊頭上。

「小朋友，想偷我龍哥個銀包？你真係太年輕啦。」

「嘻嘻。」我再好快咁撥開佢隻手，想起步跑既一剎那，就比佢絆倒係地下。








「兄弟，捉佢返去！」

唉，今次走唔甩啦，估唔到會死係惡人手上，而唔係差佬。








「你個死o靚仔，夠膽偷我啲野，好，就等你知道個死字點寫。」

我吞左啖口水，係呢個密室到，我諗我點叫都無人會聽到，唔通人生就咁就玩完？

「打！」

「啊！！」好痛，拳拳到肉，而且因為成日都無野食既我，身體瘦削，好快就招架唔住，一灘灘鮮明既血跡已經潵係地上。




「停手！」

「放佢走啦。」





打到我就黎死先叫我走，不如你打死埋我算啦...




剛剛入夜，滿口血既我，途人根本見唔到，係街角揾左個位坐低，亦即係等死。

唉，可能我罪有應得，遭報應，偷野偷左咁多年，做左社會渣滓咁耐，係時候要還社會一個安寧。



當我閉上眼既時候，係一個好黑既環境當中，我見到一個男人，佢無樣，好恐怖，但係把聲好後生，跟住同我講左一句野。

「你想要咩？我比你一個機會重生，你可以選擇你既身份。」呵，又會咁好彩比我撞到天神？





「係咪真架？」

「係，你再唔揀，我就將你變成一隻蚊。」

「唔好唔好，我諗。」

身份...做咩好呢...做總統？唔得，實比人罵死，做有錢人？唔...

「係咪咩身份都得。」

「係。」

「我諗好啦，我要做有錢人。」

「不過...我有一個條件。」





「講。」

「我唔想好似李嘉誠個啲咁，我只係想收收埋埋安安樂樂用無盡既錢過生活。」

「世界上無免費午餐，返到去世界你就會有你應得既野。」

講完野，我隨即從幻境抽出黎，原來我仲坐緊係街角。

「唉，原來係發夢。」咦，唔係喎，點解把聲好聽左咁多既？

我立即企起身，唔單只聲好聽左，仲大隻左。攞部電話出黎，照下自己個樣，就連個樣都變埋...

「我...我究竟係邊個。」





我再係褲袋攞左個銀包出黎，個銀包係唔知邊個國家既名牌；打開銀包，入面有幾十張信用卡，但係最吸引我既都係一張卡片。

「明雲集團　副總裁　王誠翔」下？副總裁，咪住，咩係明雲集團...究竟我幾多歲，我唔係讀緊書架咩？再攞部電話睇下，原來今年已經2020年，即係我已經廿一歲，睇黎讀書既生涯已經一早完結左。

卡片最後一行寫住「辦公室：環球貿易廣場99層」我吞左啖口水，原來世界上真係無免費午餐。




既然係咁，去一去自己公司都好理所當然啫。

好自然咁打開通訊錄，睇到一行「司機」，我亦立即打過去。

「喂，副總？請問係咪要車？」

「係，我而家係北角...」

「好，無問題。」

仲諗住架車無咁快到，但係十秒都無，有一架黑色林寶堅尼泊係我面前。

「副總，請上車。」

「唔該。」

「今日唔使返工都返公司？」

「係。」

人生第一次坐超級跑車，雖然車頂有啲矮，但係入面就設備齊全，唔知以為自己坐緊戰鬥機。




一邊望住出面既風景，一邊係到思考緊人生，究竟，我要點樣掌握呢個完美人生？又或者我既舉動要似返個副總裁。

「副總，到啦，落車小心。」

「唔該，以後叫我誠翔，唔好再叫我副總。」

「係既，誠翔。」睇黎我既權力要開始衍生。

黎到ICC門口，已經有6個西裝友行埋黎，應該就係我貼身保鏢。

「副總午安。」

「副總午安。」

係大堂經過既人，都好恭敬咁同我打招呼，不過我好似有啲未習慣。

保鏢送到電梯口，只係剩低兩個跟上去。




電梯上到99層，見到一個熟悉既面孔。

「老豆？」

「點解你會係到？」

「我係集團既總裁，點解唔係到。」

咩話！總裁？

「你係總裁？」

「係啊，阿仔你無野阿嘛。」

「無，我返office先啦。」

「喂，阿仔，你office係個到喎。」

「啊！係。」




我急忙咁衝左入去，見到一個女仔坐左係梳發到。

「啊，唔好意思，我出返去做野先。」

「咪住，你係咪我秘書？」

「下？係啊，副總。」又副總...個名真係老土。

「做我秘書點解要出返去做野，做野就係我office做，知唔知？」

「係既，副總。」

「同埋，唔好再叫我副總，叫我誠翔得啦，Chole。」好彩我醒目見到枱面上有兩個名牌一個係秘書個名，Chole。




「係呢，今日烽火聯盟既阿天揾你喎。」

又咩烽火聯盟啊...究竟係有無一個天使可以指教下我既人生啊...