【英雄系列2】無敵光晨: 4

「阿紫，你升去邊間中學呀」

「何文田官中呀」

「咦我都係喎，咁光晨你呢」

「....九龍華仁」

「好犀利呀..」





「但係...咁樣就唔可以同阿紫阿南你地兩個..讀同一間中學啦...」






「叮噹！」

「邊個呀...」食住煙既我打開家門




「係我呀！阿紫呀」
「哦入黎丫」

入黎既，除左著住典型女教師suit既阿紫之外，仲有



拖住兩個大o急既素素，同一隻臘腸狗！







「做..做咩素素都黎左既...」阿咲問
「光晨..」
阿紫忽然鞠躬:「請你...比素素響度住，做素素既監護人啦！」

「吓..唔係掛..」
素素低住頭:「依家我間房已經比我阿叔收左，我同肥仔都冇地方住..」
「光晨先生，請你收留我啦..」
佢口中既肥仔應該係隻狗

「但係...」
點知阿南搶住講:「得！緊係得啦！」
我捉住阿南:「喂你做乜...」
阿南細細聲講:「幫我響阿紫面前加下分啦，唔該..」





「唉...好啦好啦」
阿紫終於露出微笑:「太好啦，多謝你呀光晨！！」
素素亦少有地笑起黎:「多..多講光晨先生..」

「你冇理由白食白住架..咁你識d咩呀？」
素素如數家珍:「我識C program，assembly language，MATLAB，Java...」
「唔係講呢d呀屌，你識做咩家務呀？」

素素紅都面哂咁:「我...我未做過家務，由細到大都係我個工人姐姐做」
我屌左一聲:「唔撚係掛，依家d 90後真係垃撚圾」


屌，無啦啦又要養多個o靚妹









「為左慶祝素素加入我地既大家庭，大家飲杯！」阿南同阿咲舉起杯
佢兩條友仔話要打邊爐，當係歡迎素素
我真係唔知間偵探社係我定係佢地

素素亦乾起杯:「...多..多謝你地」
阿咲用手批一批我:「喂呀光晨，熱情d啦！」

「哦...唉歡迎你呀歡迎你呀」我敷衍地拎起黑啤
「對..對唔住呀光晨先生..」素素低住頭:「我...係咪好無用呀..咩家務都唔識，淨係黎白食白住..」

我嘆一口氣:「家務呢d好簡單姐...做下做下就識架啦..」
「汪！汪！」素素果隻叫肥仔既狗響度無啦啦對住我吠





素素摸住肥仔既頭:「做咩呀肥仔..」
我同肥仔對望住，發現佢好似對我有敵意咁
大佬，咁你個主人真係乜柒都唔識做丫嘛



「嗱，素素你以後就同我同房啦」阿咲將床上既野執好
素素點一點頭:「嗯...」個樣好似好唔滿意咁

「做咩呀，嫌細得濟呀？」我不滿地問
素素比我嚇倒:「唔...係」
「唉，廢事理你個太子女，你聽朝起身返學唔好嘈醒我就得啦」

阿咲鬧鳩我:「喂呀光晨，素素女仔黎咋，唔好對佢咁衰啦」




屌，我以後要白養佢同隻狗，唔對佢衰d邊對得住自己








翌日

「砰！！！」

房外一下巨響將我嘈醒



我行出去大廳
「屌...7點幾咁嘈做乜鳩呀..」

我望住地下碎左既碟，再望住著左校服既素素

「對...對唔住呀光晨先生，我...諗住煮早餐，點知..」
仆街，素素真係打靶女黎

我拎起掃把清理碎碟:「屌，你真係姐手姐腳...」
「對.對唔住...」素素仲想拎起個平底鑊煎蛋

我馬上搶左佢:「屌你，咪再整爛我果d野啦，我幫你煮啦屌」
素素聽到後，有點害羞:「吓...唔該光晨先生」
唉，依家d 90後真係廢青黎..


我將一份英式早餐放響素素面前
「屌，食完快d返學，唔好阻住我訓教呀」

「唔該..光晨先生..」
素素狼吞虎咽咁將香腸同煎蛋塞入口裡
「好..好好食...」

「你個死o靚妹真係睇少我，我響美國果陣餐餐都自己煮，煮煮下就緊係煮得好食啦」
「光晨先生你去過美國架？」素素邊食邊問

「嗯，過去讀書姐」
「咁...」素素繼續追問:「點解光晨先生你會返黎既？」

講完呢一句，我成個人定住左
素素自知問錯:「對唔住...我問..問錯野..」


食完早餐之後
素素拎起名牌背囊，打開家門:「光晨先生，咁我出門口先啦..」

「喂！」我喝住佢
素素回頭:「做..做咩呀..」
「死o靚妹，7點10啦，我車你返去啦」

素素想婉拒我:「唔駛啦...我都..」
「我驚到時阿紫話我做乜搞到你遲到咋，你以為我真係想車你呀」
「咁..咁好啦...唔該...」




憑住我果手車，10分鐘就返到去素素間學校
「你放左學自己返黎啦，我唔車你架啦」
「光晨先生，唔該哂你..」素素點頭向我道謝:「係咁..我返學先啦..」
「嗯..」

唉，呢個素素乜柒都唔識，以後有排受



返到去偵探社，阿咲同阿南都醒哂
「咦，光晨你出左去既？」阿南食住麵包問
「果個死女包就黎遲到，咪車佢返去囉」我攤上梳化，點起紅萬

阿咲奸笑道:「嘿嘿，其實你好關心素素既，係咪呢？」
「你on9！」我連忙反駁:「我係廢事阿紫又話我唔好好睇實佢咋，得撚閒關心佢！」
講真，我真係對呢d死o靚妹冇性趣，又冇美腿，食屎啦

「其實，素素本身應該係個幾開朗既女仔黎既..」阿咲道
我吸左口煙，問:「屌，你又知？」

「佢尋晚訓唔著，我咪同佢傾左成晚計囉」阿咲飲左一口牛奶，道:「素素以前係籃球校隊黎，又成日負責做周會mc，只係一時 
間接受唔到daddy媽咪過左身，先性情大變姐」
「我覺得，我地應該試下比返d家庭溫暖佢，咁佢就會更加快好返啦」

我真係無佢咁好氣:「你地兩個自己慢慢比啦，我先唔得閒做佢便宜老豆..」
「唔好咁啦光晨，你幫到素素，阿紫都會對我..」阿南肉緊道

「阿南哥，唔好成日靠我啦，我比哂機會你架啦，你自己爭取得唔得？」
「哦...」阿咲驚奇地指住阿南:「原來阿南你鐘意阿紫架？！」
我:「佢條友呀，鐘意左十幾年都唔敢開口啦」

阿咲:「呵呵，咁阿南你都幾長情架喎..」
阿南只係摸摸頭:「但係...次次見親阿紫都唔敢開口..」

「屌，條條女自己送到埋口咩！自己主動出擊啦南哥..」港男其中一個特徵，就係以為d女會主動痴埋黎溝你
醒下啦好心，以為睇緊高登d故咩

「係喎...咁光晨你有冇追過女仔呀」阿南問
阿咲竟然睇死我:「你個格咁臭，睇死你最後都溝唔到啦！哈哈」
「你都on9，我..」



「叮噹！」
「咁早有客，少有喎..」我暗道，前往打開大門:「邊個呀？」

「死仔包，唔係咁快唔記得我下話..」一個抽住黑冰煙既肥壯大叔笑道
「哈...原來係你呀陳sir，入黎坐丫！」

陳sir以前同我老豆係fd黎，算係睇住我大既
雖然佢係一個老差骨督察，隸屬西九龍O記
但實際上佢完全唔信其他差佬，所以有案一直都係自己搞
我返左黎之後，有時佢都會搵我幫佢查下d無謂野

陳sir坐低後問:「咦，呢兩位..你d新伙記黎架？」
我笑道:「嗯，廉價勞工，當請條友返黎執頭執尾囉」
阿咲不滿:「喂呀光晨，乜你咁講架！」
「車，有講錯咩！」我接住再問陳sir:「咁...陳sir今次搵我又咩事呀？」

陳sir遞上一堆相片
「呢一個係我近日追查緊既一個國際販毒組織，叫Ouroboros」
我答:「銜尾蛇..佢地響非美同歐洲都有生意」

「嗯，呢方面你知得清楚過我啦」陳sir點頭:「我條針話，佢地大約響兩星期前聯絡過合興既龍頭大佬..希望佢地幫手響香港散 
貨」
合興係現時香港最大既黑社會，專做毒品、賣淫生意
「而響幾日前，合興既人岩岩就由意大利，成功將果批貨帶返香港..」

「所以，我就係想搵光晨你查下，到底佢地既下一步係點..」

「嘿，呢單野都幾危險喎...咁你比幾多錢先？」我好現實，錢始終都係我決定接唔接呢份job既首要條件
陳sir遞上一張支票:「6萬，我開公數比你」
陳sir響警隊算係有d地位，冇乜人夠膽郁佢，所以佢一直都係用公數外判d野比人做

「好丫，值得一搏」我搶過支票:「詳細資料呢？」
「十八區都有合興擺貨既倉，其中，佢地響元朗工業邨就有一個大型既工場，係比佢地製毒」

「你既意思，係佢地應該會擺批貨響果度，再慢慢分出去各區？」
「嗯，地址我一陣send比你..咁單野我靠哂你架啦光晨，有咩消息即刻call我啦，我返差館先」陳sir從梳化企起身，準備離開
「哦，遲下見啦」

響陳sir走左之後，阿咲就即刻問
「點解呢個陳sir明明係差佬，但係都要搵我地去幫手查呢d毒品案呀？」
我答:「陳sir佢響後生果陣...曾經比拍檔出賣過，所以依家佢唔會信任何差佬」
「咁點解你會識佢既？」阿南問

「佢係我老豆既朋友黎，乜你地咁八掛架..傾起今晚既行動好過啦」
阿咲:「關心下你姐，話哂我地都仲係對你既過去一知半解」

「哼，廢事理你地..你地收我份糧架，幫手諗下今晚點潛入去元朗個工場度查好過啦」
「一陣，阿南你響樓下睇水，我同阿咲就上去，襯機會入去調查」
阿咲打左個突:「吓，咁危險？」
「大小姐，你尋日就話我唔比野你做，今日又話危險，不如你幫我揀埋job啦」

「咁點解，唔係我上去呀」阿南問
「你尋日響地鐵都比條女打鑊金，我驚你一陣上完去落唔返黎咋」




傍晚7點
我等一行三人已經揸車到左元朗
我將泊響該座工業大廈既停車場內

「喂，光晨，係咪真係呢度架？呢度點睇都似係普通既商業大廈咋喎...」
我望住手機上陳sir比我既地址:「嗯，陳sir唔會呃我」

正當我同阿咲準備行出車時

「批貨搬哂落黎啦嘛？咁開車啦！」停車場既另一端傳來呢一把響亮既聲音
不久，就有五架印左「威健倉務」既貨van駛出停車場

「直覺話比我知，呢5架車裝住既，就係合興果批貨」
「你咁肯定？上落貨好正常姐」阿南問

我直指阿南既盲點:「傻仔，邊有人7點先上貨架，你未收工人地都收工啦...阿咲，準備好未呀？」
阿咲有點猶疑:「...嗯」
「定d啦，有我響度，唔會出事」我點起香煙，打開車門

我地跟住樓下既地圖上到13樓，「威健倉務」所在既樓層
由於已經係放工時間，四周既燈光都顯得昏暗

「阿咲，行路細力d..」
我同阿咲慢步到G室，威健倉務既招牌前

「唉，終於搞掂批貨」係頭先停車場既果把男聲
「聽聞今次批貨係阿公響意大利買返黎架喎」
「嘩咁重手？」
「係呀，阿公話批貨好值錢，諗住響銅記同尖嘴d場放哂佢喎」
「但係，阿公不嬲響大陸入貨，點會去意大利入貨呀？」
「聽聞對家係大組織黎，阿公可能想拉攏佢掛」
呢d料總算有d用，但仲未入到正題


「咔！」
仆街，阿咲竟然踢到腳邊個汽水罐

「唉..累事啦你」我不滿道
「對唔住囉，我睇唔到嘛」
「真係麻鬼煩，又要我幫你執屎」


「邊個！！！出黎！！！」

無計啦，隔左咁耐，係時候要帶返「佢」



我戴起大褸內既鋼鐵面具，向倉內既十幾個古惑仔現出真身
「我...就係Slipman，今日黎收你地皮既」
呼，戴住面具打交，感覺真係自在d