[愛情無限loop] 就係咁，我做左女神一年既備胎: ３２５　藍臣呂晨

如果阿琪真係同我所諗既一樣，佢一定會去呢Ｄ地方。

一定會。

我望住面前既紙，不停回想阿琪同我曾經去過既地方，「牛仔，你係度寫咩啊？」我媽媽佢行左入房，而我就一路寫一路話：「阿琪佢唔見左，我一定要搵佢出黎。」講完後我望住媽媽，「對唔住，呢個時候我竟然做呢Ｄ事。」

媽媽佢望住我微笑左一下，「傻啦，如果你阿爹仲係度既話，一定會即刻叫你去。」

「嗯，我會早去早回。」我答。



回想返同媽媽講呢一番話，我真係覺得我有一個好幸福既家。

分組其實都一如既往，阿珍阿塔組、ＣＯＷ同ＪＵＤＹ組、能蟹能利組、七三廿一拾拾組、金姐ＳＵＮＮＹ組，而藍臣、呂晨同我就係一組。

「我地不如開返個ＧＲＯＵＰ，等大家聯絡都方便Ｄ。」ＪＵＤＹ講完後用電話整左一輪後，我玩話就有一個群組既ＭＳＧ，然後ＪＵＤＹ就話：「阿牛，你今次唔好再ＱＵＩＴ　ＧＲＯＵＰ拿。」

我望住群組既標題，「邊個ＱＵＩＴ　ＧＲＯＵＰ就打死邊個」，笑左出黎，然後話：「呢個ＧＲＯＵＰ我一定唔會ＱＵＩＴ。」

「好，咁出發！！！」估唔到一開始講野好難聽既能利，竟然突然好熱血地大叫左呢一句出黎。



就係佢呢一句咁熱血之下，搵阿琪既行動開始。

其實我對自己所列出既地點只有一半信心，不過以前當阿琪唔開心既時候，我都係去呢Ｄ地方搵返佢，希望佢今次都會係呢Ｄ地方出現。

公園、海濱、運動場既觀眾席、小食街……佢一唔開心就會去呢Ｄ地方，可能係大喊一場，可能係吹海風吹到塊面凍冰冰，可能係跑到累後坐係度休息，又或者係不停食野。

阿琪，妳係邊啊？點解妳唔理我地啊？

藍臣仍然不停咁ＳＤ　ＭＳＧ比阿琪，但係都無結果，而呂晨就用佢既人際網絡，姐係佢以前收過既兵，發散左好多人放消息出去。



「呂晨……妳仲有收兵咩？」我問，而呂晨反左一下白眼話：「我已經無收好耐，但有Ｄ人仲成日中個頭過黎我都無辦法，未就好似你鐘意阿琪咁囉。」

呢句說話我同藍臣聽到，都好尷尬咁笑左一笑，呂晨見到藍臣既反應就話：「估唔到你都係阿琪既裙下之臣之一。」然後，佢嘆一嘆氣又話：「當我決定唔收兵後，我好明白阿琪既感受。」

佢呢一句，吸引左我同藍臣既注意力。

「原來當你想好好認識朋友對人好果陣，對方回錯意，當坦白話比人知果陣真係會有一種不安既感覺，因為你唔會知道，當你如實講出口後，會唔會仍然有朋友做，最奇怪既係，明明你所做既方法係正確，但都會覺得自己做緊一件錯事一樣。」呂晨語重心長咁講：「所以，阿琪係好堅強既人，唔係佢選擇唔拒絕，而係佢情願背負一個收兵既罪名。」

「無錯，阿琪係個好堅強既人。」藍臣開口話：「不過，我其實想阿琪可以更加直率。」

「但如果阿琪直率既話，就唔會有你地兩個對佢咁好既朋友。」呂晨話：「其實收兵定被收兵，備胎或被備胎，都係因為想享受愛既過程，只不過係一個無結果既愛，如其無結果，倒不如唔開始，一直係朋友就算，所以，阿牛，如果阿琪真係選擇要走出朋友既界限而同你進一步，你一定要好好對阿琪，不竟你同佢都花左好多時間先可以走到呢一步。」

藍臣聽到呂晨咁講後，突然停低左腳步，而我見佢突然低，我都停低左，佢行到呂晨既面前，伸出手，「頭先都未做自我介紹，我叫藍臣，藍色既藍，君臣既臣。」

而呂晨，佢都伸左隻手出黎同佢握手，「我叫呂晨，呂布個呂，早晨既晨。」



我覺得，佢地係無意中搭上左。