[愛情無限loop] 就係咁，我做左女神一年既備胎: １７４　重遇舊友

能蟹係七三廿一面前示範左一次招數後，七三廿一急不及待想試下，但係佢一直都搵唔到目標。

但係成晚流流長，又點會搵唔到想下手既女仔，所以終於，七三廿一搵到一個目標，「我上架拿。」佢同能蟹講左句，然後就行左去個女仔度。

唔知點解，個女仔既背影有Ｄ似曾相識既感覺，但係又講唔出係邊個，而阿琪見到我咁既表情，就問我：「做咩啊？」

聽到阿琪咁問我，我就答佢：「唔知點解，總覺我呢個女仔既表影有Ｄ熟口面。」

「牛兄一定成日出黎飲野，所以見到熟人唔出奇。」能蟹真係識講笑，我聽到後笑左幾句，但係唔知點解ＪＵＤＹ拍一拍我，示意我望一望阿琪，我一望向阿琪，見到佢好似嬲嬲地……唔係掛，佢唔係真係信能蟹講既野掛。



「真係有少少熟咋，而且我邊有成日出黎飲野，次次都係陪妳先出殷飲架咋……」我不停向阿琪解畫，但係佢都係唔理我。

而係呢個時候，七三廿一出手拿，「小姐，可唔可以幫我拎住個酒杯啊？」

我地幾個都放低頭先討論既野，靜心咁望住七三廿一今次成唔成功。

不過，羅馬唔係一日建成，個女仔講左句：「唔駛客氣，我想自己一個人飲野，你搵其他人幫你啦。」

七三廿一就咁比個女仔拒絕左，而呢個唔係重點，而係，把聲好熟……係真係好熟，我行左過去，而七三廿一剛好準備返來，佢見我行到佢面前，就話：「你特登過黎安慰我架？」我拍一拍佢既膀頭，然後，行到果個女仔既面前，坐左係佢旁邊。



「我都話想自己一個……人。」個女仔見到我就話：「阿牛，點解你係度既？」

「係我問妳點解係度先真啊，阿珍。」無錯，呢個女仔原來係阿珍，唔知大家仲記唔記得係我識阿琪果陣，阿珍都係我其中一個拉埋一齊入ＧＲＯＵＰ既人，而亦都因為阿琪，佢同我另一位好朋友阿塔鬧翻左。

估唔到，已經有成半年有多。

而七三廿一見到我原來識呢個女仔，就問：「阿牛，你識架？」

見佢咁問，我點一點頭。



「可唔可以介紹我識啊？」佢又問，而我望一望阿珍，阿珍就問：「跑ＧＲＯＵＰ　Ｄ人？」

「係啊，我地果邊有幾個朋友，不如一齊飲？」我問阿珍，不過我預左佢扔絕，但係估唔到，「好啊，行啦。」

聽到佢咁講，我拉一拉佢同佢講：「阿珍，阿琪都係果邊。」

佢聽到後就望一望我所指既方向，然後就話：「放心ＷＯ，無事啊，大家都咁大個人，唔會打大架既。」然後佢就係我耳邊問：「你追到阿琪未啊？」

佢突然咁樣一問，我只係笑左一聲，正想答佢果陣，點知比七三廿一打亂左，「原來阿牛你先係高手，點解佢同你咬耳仔？點解你要笑？點解？」

真係唔多想理七三廿一。

如是者，阿珍就ＪＯＩＮ左我地，當阿珍行到去果陣，阿琪都嚇左一跳，然後我就話：「都話個女仔背影好熟架啦，原來係阿珍黎架。」

阿琪聽到後，扁咀咁望左我一下就繼續扮男，而阿珍一見到就話：「牛兄，你有排受拿。」



ＪＵＤＹ一聽到阿珍呢一句，就大笑咁話：「妳講得好岩，睇黎我會同妳做到好好既朋友。」ＪＵＤＹ……妳未咁假啦。

七三廿一既目標就係咁巧估地埋到臺，佢當然把握機會不停問阿珍野啦，佢仲係好似以前咁樣問，不過阿珍又好好人地答佢。

其實，我見到阿珍好想問佢，佢同阿塔而家點，不過，阿琪在場，呢件事都係唔好咁快問佢住。