[突發][唔係蛋黃哥]大撚鑊_我一起身發現變左做粒蛋黃: （十）
「坤叔，你望到我實一實，係咪我有D咩唔掂呢？」我緊張的問。
「你……D鼻毛露晒出黎！好核突！」坤叔說。
「屌你！無時間剪者，唔駛咁呀！」我尷尬的掩著鼻子。
「唔好擋住先！小明，你呢期係咪遇到D咩古怪野！坤叔做左人咁多年，睇過嘅面相話多唔多，話少就肯定唔係架啦！你個相……同撞鬼嘅人好似，但……又有少少唔同！」坤叔說話模稜兩可的，弄得我不知所措。
「屌，者係點呀坤叔？咁究竟係鬼定唔係鬼呀？」我說。
「咁講啦，呢個世界除左人類社會外，仲有好多奇怪野！妖呀，魔呀，神呀，佛呀呢D，你呢個面相，係遇到一D非人類嘅生物！好似以前咁，香港都有D城市傳聞，話咩狐仙果D！佢地嚴格黎講，唔係我地所講嘅鬼黎，但都係不祥之物！」坤叔說得頭頭是道，使我也感到心寒！
「坤叔你咪亂鳩咁講喎！我我我唔驚架！」我說。
「我有話直說者！有無遇到怪事，你自己先知！之前你話搬左入去間新屋，你有無查過有無發生過D咩怪事呀？」坤叔說。
「我……無查呀！」我說。
「你快D查下啦！唔怕話你知，呢排深水埗真係好古怪，成日烏雲密佈咁！有D老街坊同我講，話佢地身邊有D人無啦啦唔見左！仲有，我地有D日日黎嘅客人都消失左！你有遇到怪事嘅話，盡快查下啦！」坤叔說。
「吓……點點點查呀？」我愈聽愈不安。
「吓？咪問返個經紀有無死過人果D囉，有法例規定佢地要答你架嘛！至於其它怪事，如果你真係唔掂，可以去搵我師傅嘅！」坤叔說。
「師傅？」我問。
「係呀，我學過咁多野，跟過好多個師傅架！不過，真正有料嘅師傅唔多！而當中又肯幫人嘅得佢架Ja！」坤叔說。
「雖雖然我唔信，不過你都係俾定我啦，我有時間去搵佢啦！」我說。
「坤叔年紀大，記性唔好，你聽日再黎啦！我今日返去搵下師傅張卡片啦！」坤叔說。
「吓……咁好啦！」我無奈地說。
結束對話後，我便來到便利店準備工作。
「喂，小明！你搞咩咁殘呀？」說話的不是阿祥，竟然是說不會再當夜更的阿強！
「咦？阿強？點解你會係度架？阿祥呢？」我腦海充滿了疑問。
「哦，無呀，阿祥同我講佢今日夜晚有野做，問我可唔可以調更，我咪同佢調囉！一日半日者！」阿強說。
「吓？但係，你之前唔係話唔再做夜更咩？你又話睇到……睇到D野嘅？」我說得很隱晦，因為阿強看來……有點不同。
「我有咁講過咩？無理由架？是旦啦，反正一晚半晚者！」阿強說。
「你……真係唔記得之前同我講嘅野？」我對他說。
「之前？我同你講過D咩呀？」阿強說。
「早兩日，你話見到我同個經紀一齊呢！之後你話見到D雞蛋果件事呀！」我說。
「吓？早兩日我有見過你咩？同埋咩雞蛋呀，我唔知你講咩喎！你係咪記錯左呀？」阿強說。
果然，他甚麼也不記得了！
「吓，係……係卦！」我說。
「你都似架啦，個樣殘到咁！攰嘅話入去員工室休息下啦，今晚應該無咩生意，我一個頂住得啦！」阿強說。
「咁……我休息十分鐘啦，陣間到你抖返十分鐘！」我說。
「得啦，講呢D！」阿強說完後，便繼續工作。
我進入了休息室，思考著阿強的變化，實在太不尋常了！
我又打開了高登，發現之前那個消失的友人Post已經消失了，任我如何搜尋也找不到！
而另一件奇怪事，就是之前失去了消息的高登用戶，也逐漸在高登出現了！
「心層次心層次，搵到啦！」我尋找著第一個開Post的樓主，很快在講故台找到了他！
「校園鬼故？搞咩呀，點解搵唔到佢開果個Post嘅？」我在他的個人資料裏找不到相關的Post！
最後，我決定PM這位巴打：「巴打你好，早前你出過嘅消失的友人Post呢，我都有朋友遇到呢D問題，想問下你D資料！麻煩你回覆我，謝謝！」
「希望佢會覆啦！」我心想，然後離開了員工室，打算接替阿強。
但當我推開門時，我竟然發然，于珊竟然在店內選購著飲料！
想不到她竟然還夠膽出現在這裏！
我壓抑著滿腔的怒火，走到她身旁，正準備口出惡言之際，她竟轉過身來！
「你好呀，我想問呢支野飲幾錢呀？我見佢無左個價錢牌！」她說，語氣像完全不認識我似的！
我呆呆的看著她，一時間語塞起來，不知道該怎麼回應她。
可能她看見我完全沒有反應，於是便向阿強查詢！
「哦，呢支，唔好意思，等我幫你睇下先，$6.9呀，你係咪要呢支？」阿強說。
「唔駛住，我再睇睇先！果個你同事黎架？佢係咁望實我，好無禮貌囉！」她說。
「唔好意思呀，佢可能病病地，醒唔起幾錢，所以先呆左望住你者！喂，小明，你過黎講聲唔好意思啦！」阿強說。
我一步一步走向收銀機前，腦子完全運作不了，也不知道應該對她說甚麼，仍然是呆呆的看著她。
「唉，唔駛啦，佢呆下呆下咁，都唔知係咪有病！你俾頭先果支我得啦！哎吔，我無晒港紙添，得D英磅係身，你地收唔收英磅架！」她說。
「吓？唔好玩啦小姐，我地邊會收英磅呀？」阿強說。
「咁點呀，我真係無港紙喎！」她說。
只見他們兩人都在爭吵，我竟不自覺地說：「阿強，你照過機啦，我幫佢俾！」
「吓？哦，咁好啦！」我用百達通付了款後，這女人跟我道謝後便準備離開。
「喂，小明，你搞咩呀？唔好見人靚女就幫人俾錢得架！」阿強看來相當不滿，大概是他認為那女人是個騙子吧！
「阿強，你係度頂多陣，我有野要問一問佢！」話畢，我留下阿強一個在店內，然後追了上去！
我知道，若我不問過明白，我是不會死心的！
「小姐！小姐！」我大叫。
「邊個？咦……你係……頭先果位店員？做咩呀，我無港紙俾返你架！」她明顯的警戒著，大慨認為我有甚麼企圖吧！
「我唔係想問你要錢或者要對你做D咩……不過……我想問，你有無孖生姊妹或者細佬架？」我問。
「吓？我獨生女黎架喎！你唔係咁老土諗住咁樣識女仔呀？」她明顯變得更有戒心。
「奇怪，佢居然連細佬都無認，唔通我真係認錯人？但係……無理由嘅！」我心想。
「咁，我想問你，你係咪英國倫敦果邊返黎架？」我問。
「係呀，咁點呀？我返黎香港玩唔得咩？」她退後了一步！
「嗯……其實……呀……」我不知道應該怎樣繼續話題。
「你無野問我走先啦！」只見她轉身便準備逃跑，我應該怎樣做才好？
「于……于珊！黃于珊！」我情急下大叫。
她停下了腳步，轉過頭來望向我，臉上露出難以置信的表情。
「你係黃于珊，英文名係Sharon！你住係旺角酒店，大約一星期之後就會返倫敦！」我一口氣把我所知道的事情說了出來。
「你……你係咩人？點解你會知我叫咩名，又知我住邊架？你跟踪我？我唔識你架喎，你想點？」她明顯變得更加敏感，看來我在她心目中已和跟踪狂一樣了！
「我叫陳小明，住緊你細佬之前住嘅地方！尋日你仲走左去搵一個叫王馬門嘅經紀，諗住搵佢問返你細佬嘅野！仲有，你尋日仲Send左好多message俾我，話俾我知你嘅情況！亦都有打過俾我！但因為我訓左，所以無回應到你！而我尋日諗住搵你嘅時候，就發現打唔到俾你！你記唔記得？」我再說，仿佛這樣便可以勾起她的記憶一樣。
「痴線！我都唔知你講咩！你唔好再跟住我呀！我報警架！」她準備再次離開。
我馬上拿出自己的電話，準備致電給她，證明我真的擁有她的電話，卻發現所有電話紀錄都不見了！而且連Whatsapp紀錄都沒有了！
「奇怪！點會無晒？算數！太睇小我呢D毒男，唯一一個出現係我手機嘅女性電話，我又點會唔記得！」我馬上輸入印象中的電話號碼，拜託，我的記憶不要出錯啊！
然後，只聽到電話鈴聲，從她的手袋裏發出！
她也感到非常錯愣，看著她的手袋，停下了腳步！
究竟，她會接聽我的來電嗎？