［人性/有甜］- 屍•家•馬鞍山（隔日更新）: Chapter 711 - Vicky 的傷勢

「我哋去到大門口，先至記得大閘係冇打開過嘅...」Vicky 說道，「我哋即刻拍門同大叫，希望可以叫倒人開門...」

「但係同時間，我哋亦都引咗唔少喪屍過嚟...」她回憶道，「雖然我見倒合一堂入面都有人出嚟，但係啲喪屍已經殺到埋身...」

「入面個人見倒咁多喪屍，就更加唔開門轉身就走...」Vicky 不快地說道，「我哋無辦法之下，唯有諗住打得幾多喪屍就打幾多。」

「不過，我哋嘅子彈好快已經用曬。我就唯有用軍刀同佢哋肉搏，由 Marcus 負責保護你...」

「我哋一直捱到林牧師出到嚟，先至可以入到合一堂入面...」



「我哋即刻將你送入嚟，比牧師睇吓你個傷勢...」Vicky 續說，「但係連我自己都唔知，我自己隻腳都受咗傷...」

「一路到牧師睇完你，話你好奇怪咁冇失血，呼吸脈搏又正常...」她用疑惑的眼光打量著我，「所以佢都話冇嘢好做，只可以比你唞吓再觀察...」

「牧師講完之後，我先開始感覺倒隻腳痛，仲痛到跪在落地...」她笑著說道，「嚇到佢哋都好緊張。」

「佢哋即刻扶我去另一間休息室，幫我檢查隻腳...」Vicky 突然貼近我耳邊說道，「其實，我隻腳唔係扭親...」

她壓低聲音跟我說，「牧師同我一睇，先至發現我腳上面有一道血痕。」



「到嗰陣我先醒起，我攞刀同啲喪屍打嗰陣，好似有隻喪屍撲過埋嚟，痛咗一吓咁...」

「不過可能我冇乜為意，之後又夾硬走返嚟，先變到瘀咗一撻...」

「牧師見倒我嘅傷勢，就同我講我個傷口唔係一般嘅扭親，但係為咗唔想引起出面嘅人恐慌，佢就同其他人講我係扭親...」

「咪住先！」我暫時停下她的說話，「知道妳個傷口嘅，係咪淨係得林牧師一個？」

「嗯...」Vicky 想了一下後答道，「當時，Marcus 都在場...」



我對他的存在，感到有點不安...

「Marcus 佢有冇做過咩奇怪嘢？」我問道。

「唔...」Vicky 努力地回想，「佢一直都有幫吓手，攞吓繃帶，拎走啲垃圾咁...」

我感到有點奇怪...

「妳話佢拎走咗啲垃圾，知唔知大致上係啲乜嘢？」我想弄過明白。

「唔... 我冇刻意去睇喎～」她無奈地答道，「我諗都係啲用過嘅紗布、繃帶咁囉～」

紗布、繃帶...

他會不會？



「做乜呀？係咪有咩問題？」Vicky 看我想得入神，於是便開口問道。

「嗯... 我諗應該冇乜嘢嘅...」我不想她多想，只好這樣答道，「咁而家妳隻腳，仲有冇痛？」

「痛就冇乜喇，係隻腳好似用唔倒力咁...」Vicky 按著她的腳說道。

「比我睇吓...」我示意她移動身軀給我查看。

我小心翼翼地把 Vicky 腳上的繃帶解開，好讓我查看她的傷勢。

只見她腳上有一條已經愈合了的血痕，和瘀青了的一片。

看來，喪屍病毒並沒有在 Vicky 的體內擴散開去。



難道 Marcus，也有留意到這一點嗎？

得找個機會打探一下。

「嘻嘻... 我哋好似又死過翻生...」Vicky 笑說道。

「係...」我點頭答道，「不過情況一次比一次凶險...」

其實，我心裡十分害怕，終有一天我或她會遭遇不測。

「如果你驚嘅話，不如我哋搵個地方自己生活吖？」Vicky 見我對前路感到迷茫，便再舊事重提。

而我的心態，確實已經有點改變...

與其在這裡每天經歷著生死，倒不如跟 Vicky 去享受生命。



「妳... 比啲時間我認真考慮吓...」雖然心態有變，但我還是覺得不能這樣衝動。

「嗯...」Vicky 苦笑著說，「我都知你唔會咁易放棄㗎喇～ 不過我都係嗰句，你去邊我都會支持你...」

「多謝妳...」我沒有多說話，趨前便是一個熱吻。

「嘩！睇嚟我哋早咗入嚟喎～」正投入之際，阿君卻帶著數人進來，並出現在我們的面前...