［人性/有甜］- 屍•家•馬鞍山（隔日更新）: Chapter 710 - 探望 Vicky

Miki 雖然勉強解釋，但仍逃不過 JoJo 眼神的質疑。

「咩喎～ 咁係吖嘛～」Miki 不忿地說道。

「得喇，妳話係就係啦！」JoJo 亦好像不想跟 Miki 再糾纏，只好選擇相信她。

「係呢，阿 Roy 你點呀？」JoJo 终於有空關顧我的情況，「聽講你好英勇咁喎～」

「哦... 都唔係啲咩事啫，我都係誤打誤撞咁...」我不覺得有什麼值得表揚。



「你唔洗咁謙喇～」JoJo 興奮地說道，「你嘅英雄事蹟，已經攪到我哋嘅 Miki，成日囉囉攣啦～」

Miki 聽後，尷尬得低下頭來。

「不過妳係咪疊埋心水做二奶先？」JoJo 挨近 Miki 問道，「人哋個正印好緊張咁問住阿 Roy 點𡃓～」

「Vicky 佢冇乜事吖嘛？點解佢唔過嚟嘅？」我心急地追問。

「嗱... 你睇你緊張到吖...」JoJo 有點替 Miki 感到不值，「講！Miki 同 Vicky 你揀邊個？」



若然要我選擇，我的答案十分簡單...

「哈哈，講吓笑走咋！睇你緊張到...」我正想回答，卻被 JoJo 快一步打斷。

「你係咪想見吓你過 honey 呀？」JoJo 問道，「係我就喺出面搵部輪椅入嚟，推你過去喇～」

「好呀唔該妳...」說罷，JoJo 便在外面找來了一輛輪椅。然後 JoJo 便與 Miki 合力幫我坐到輪椅上面，再由 JoJo 推我到 Vicky 的房間中。

「阿 Roy...」剛剛看到我的 Vicky，便激動得哭了起來。



JoJo 把我推至床邊，好讓我們來一個深情擁抱。

「我唔阻你哋喇，有咩需要再搵我...」JoJo 亦知趣地先行離開。

「阿 Roy... 你冇事吖嘛？」Vicky 打量著我問道，「你之前暈咗，我好擔心你...」

「放心，我冇乜嘢...」我撥弄著她的秀髮說到，「隻手同腳嘅知覺，喺頭先已經好得七七八八...」

「係條腰好似冇乜感覺，同對腳仲好似冇乜力咁...」

我見她打量著我，但眉頭卻一直深鎖。

「妳呢，冇乜嘢嘛？」我問道。

「我隻腳喺帶你返嚟果陣扭親...」Vicky 摸著自己那包裹著的右腳說，「不過，牧師睇過話唔算好嚴重，休息番一兩日就 okay...」



「但係我暫時就唔可以落床住囉～」Vicky 嘟起小嘴說道，「同埋，間唔中隱隱作痛咁囉...」

我看到她的情況，內心突然感到一陣自責。

因為，在十數分鐘之前，我仍沉醉於另一個女人的懷中。

我真的，十分對她不起...

「我幫妳按吓吖～」我忍不住，趨前去替她的雙腿按摩一下。

「噢～ 唔該你...」受寵若驚的 Vicky，心花怒放地說道。

「係呢～ 其實嗰日發生過啲咩呀？」我想知道我暈倒之後的情況，「我暈咗再醒返之後，已經返咗嚟喺張床上面...」



「嗯... 其實我都比人打倒暈跎跎，唔係太清楚...」Vicky 答道，「不過就 Marcus 所講，你重創咗隻怪物之後，隻怪物就發咗癲咁四圍衝...」

「Marcus 只好匿埋一邊先，等隻怪物走開咗，先可以睇吓我哋嘅情況...」

「我當時有啲迷迷糊糊，但都叫做聽得倒佢叫我，同比倒少少反應佢知...」

「之後 Marcus 就轉去睇你嘅情況，但係你就完全冇曬反應...」她續說，「不過好彩，佢話你仲有呼吸...」

「我哋想帶你返出去，但係我哋攪嚟攪去，都冇辦法郁倒你，所以都唔知點算...」

「就喺我哋好無助，四圍望吓有冇嘢幫倒手嗰陣，就比我哋發現倒阿 Chris 個名牌...」

「我哋諗個名牌應該係，阿 Chris 掙扎嗰陣整甩咗嘅。Marcus 見倒之後，就即刻入咗一間房，推咗架手推車出嚟...」

「之後我哋再合力將你抬上去，然後搭𨋢上返地下...」她說道，「直至我哋上返去，離開咗部𨋢，我哋個心先叫定啲...」



「我哋之後喺地下唞咗一陣，回一回氣等自己清醒啲先再出發...」她續說，「不過，健康院出面都有唔少喪屍包圍住，所以我哋都盡量唔出聲。但係，架手推車嘅聲，好快就引倒啲喪屍嘅注意...」

「我哋知道匿唔倒，所以只好搏命咁走返番嚟...」她說得猶有餘悸，「我哋唯有邊開槍邊走，直至走到合一堂大門前面...」