［人性/有甜］- 屍•家•馬鞍山（隔日更新）: Chapter 690 - 夜遊市中心

「阿 Roy，我哋都要坐成晚㗎喇，不如我入去攞多幾件衫出嚟吖？」Vicky 問道。

「嗯... 唔洗喇...」我答道，「我根本冇諗住坐喺度全晚...」

「哦？你諗住坐一陣就入返去？」Vicky 有點不解。

「唔係...」我說，「妳都知啲喪屍夜晚好少主動攻擊㗎啦～」

「所以我想出去睇吓～」我補充。



「吓，出去？咁呢度咪...」Vicky 有點不明所以，「不過，你去邊我都會跟住...」

「放心，我哋會速去速回...」其實，我沒有太在意這裏的人的生死。

「等多一陣，等 JoJo 攞埋啲嘢食嚟，我哋就出發...」我向 Vicky 說道。

過了一會，JoJo 依約帶著食物到來。

「阿 Roy、Vicky... 你哋冇乜嘢嘛？」JoJo 問道。



「呢度都冇嘢發生...」我往外面張望一下後答道，「都 okay 嘅～」

「係呢，唔見妳個朋友嘅？」Vicky 向 JoJo 問道。

「哦？Miki 同其他女仔幫手做吓呢雜務咁，一陣我都要幫吓手...」JoJo 答道。

「喺呢度，我哋每個人都有自己嘅職責嘅...」她補充，「男人就主要負責防衛、做吓粗重嘢咁。女人就負責煮吓嘢食，其他雜務...」

「睇嚟，妳哋喺度都分工得唔錯喎～」我說道。



「都係多謝林牧師啦！係佢將呢度管理得井井有條嘅～」她答道，「所以我哋個個都好尊重佢㗎～」

「不過林牧師佢冇乜嘢嘛？」我有點在意他的情況。

「佢應該冇乜嘢啩？」JoJo 想一想後答道，「不過我之前都冇見過佢病，下晝見佢又唔覺佢有啲咩問題，一陣我會同 Miki 去探吓佢㗎喇...」

「妳同 Miki 都幾好朋友㗎喎～」Vicky 好像有意把話題，返回 Miki 身上。

「嗯... 我同佢中學已經識，之後仲一齊參加團契，不過佢就未決志囉～」JoJo 簡單答道。

「但係... 佢好似對陌生男性，特別有興趣咁嘅？」Vicky 單刀直入地問道。

看來，這是 Vicky 這趟對話的目的。

「哦... 佢係比較熱情少少嘅～」JoJo 幫忙解說。



「佢都唔算少少啦～」Vicky 這次頗為敏感。

「呃...」JoJo 看來有點難堪，「佢... 佢係比較鐘意有人錫啫～」

「或者咁講，佢係比較想搵返個錫佢嘅男仔啫～」JoJo 補充。

「不過，佢唔似冇男仔鍾意喎～」我插口問道。

「唔... 點講好呢？」JoJo 細想後答到，「佢當然有好多追求者啦～ 不過，佢屋企管得好嚴，啲男仔都俾佢爹哋趕走晒...」

原來如此...

「所以，佢並唔係你哋所諗嘅人嚟...」JoJo 不斷地為她的好朋友説好話。



聽到這裏，Vicky 亦沒有再進一步追問。

而我卻因 Vicky 的提問而暗自竊喜；因為這正正代表，她對我的著緊。

「好啦～ 我都要返去幫手喇，一陣有咩再搵我啦！」JoJo 說道，便收拾物件離開。

而我們在此再渡過了一會，便與 Vicky 爬過閘門出發。

「小心...」我本想幫忙，卻發現她已經可以自行跳下。

看來，她真的成長了不少。

「你諗住去邊呀？」Vicky 環顧四周後問道。

「唔... 其實都冇話去邊嘅，只不過離開咗咁耐，我想睇吓呢度變成點...」我答道。



「咁又係，始終呢個都係我哋土生土長嘅地方...」Vicky 有點感觸地答道，「我都想望一望...」

就這樣，我們便乘著月色，手裡拿著強光手電筒，在新港城附近的街道閒逛。

雖說是閒逛，但我們還是提高萬二分警覺。

始終，四周仍是有不少的喪屍在徘徊。

而當我們走近迴旋處附近時，喪屍的數量亦開始增多。

我們必須十分小心，以免引起不必要的騷動。

「我有一個諗法...」當我們走到鞍祿街與馬鞍山路的交界時，我回頭向 Vicky 說道。



「Okay... 冇問題...」Vicky 好像明白我的所想，亦隨即表示支持...